Myanmar State Counsellor, Suu Kyi-i US semdangtsü

Yangon, July 21 (Agencies): Tenüng magi Myanmar madak yimsü asüla, Aung San Suu Kyi-i US Tir, Barack Obama-i par linük semdangtsü jaokba onük agizüka, lai taküm US semdangtsü sentong renemba osang ka Myanmar Foreign Ministry otongdar, Aye Aye Soe-i tanü, Brehostibar nü metetdaktsüogo.
Obama-i tan Suu Kyi par US linük semdangtsü jaokba ajanga Suu Kyi-i lar linük Tir abentsü temeten monguaka, alimai la Myanmar lenila ama züngokba kuli angur.
Yaküm November ita agiba election nung lai aniba National League for Democracy (NLD)-i temaba jenjang ngua linük yimsüsütsü tashi abentsü temeten ngua aka, linük temzüngi memelaba yong Suu Kyi-i Myanmar Tir menden mebentetti lir.
Iba yongji, lai lar linük indang Foreign Minister aser State Counsellor menden abenba sülen Suu Kyi-i lar tembar, Htin Kyaw nem Myanmar Tir menden bendaktsüogo.
“Ozü lenila, Suu Kyi-i US semdangtsü sentong renema lir saka lai US semdangtsü mapang aser anogobo tanü tashi melateti lir. Tir Obama-i par US linük madak maneni ita 6 tashi yimsü asütsü temeten ngua lir aser iba mapang Myanmar aser US na tsüngda tesendaktep junga ayutsü alizüng lir,” ta Soe-i lemsatep.
Strategic Communications nung Obama’er Deputy National Security Advisor, Ben Rhodes-i yashi Naypyidaw yimtiba semdangdang, par Tir, Obama-i Suu Kyi jaokba osang metetdakja liasü.