Myanmar Tir election March 10 nü agitsü latetshiogo

Myanmar yimtiba, Naypyitaw nung Myanmar’er Lower House parliament senden amenba jakdang National League for Democracy (NLD) yimtenren telok lenila, Aung San Suu Kyi (Tiyongtsü)-i külem NLD yimsüsürtem den sensaksema aliba noksa nung angur. (Naypyitaw, March 01)

Nay Pyi Taw, March 01 (Agencies): Myanmar Tir election tan March ita 10 nü agitsü asoshi Myanmar’er Union Parliament-i tanü, Mongolbar nü latetshitsüogo.
Myanmar Tir election sentong March ita 17 nü agitsü asoshi mezüngbo anogo lateta liasü saka iba anogoji atsüzüka March 10 nü agitsü asoshi tan latetshir lir.
Tan agitsü ayongba Tir election nung Lower House, Upper House aser mitkar lenirtem rong nungi shimba candidate 3 rong nung vote tima angur candidate-i Tir menden abentsü aser tanüngba candidate 2-ji Myanmar Tatong Tir akümtsü.
Tir election agia Tir tasenba shimba sülen Myanmar-i par sorkar tasenba tentettsü aser tan March ita 31 nü nungi tenzüka Myanmar sorkar tasenbai taoba sorkar nungi yimsüsütsü tashi agizüka Myanmar madak yimsü asü tenzüktsü.
Yaküm 2015 küm November ita 8 nü agiba election nung takok angur Parliament yimsüsürtemi par senden taoba February ita 8 nü nungi tenzüka amenba osanga jangjaogo.
Yaküm agiba election nung Myanmar nung democracy yimsüsütsü yimya benoktsü asoshi taküm bendanga agüja nokdakla, Aung San Suu Kyi-i aniba National League for Democracy (NLD) yimtenren teloki sorkar tasenba tentettsüsa takok ngua liasü.
Ajisüaka, bendanger ka den kibong akümer mesüra pei chirnurtemi bendang senso agia alir yimsüsür ka nem Tir menden mebendaktsütsü asoshi linük temzüng nung lateta aliba yong Britain nunger den kibong akümba den külemi, jabaso anapronglai Britain senso agia aliba yong Suu Kyi-i election nung takok tulu nguaka, lai Myanmar linük Tir mendenbo mebentettsüsa tetsükdaktsü tulu ajurua lir.