Myanmar Tir, Sein-i Suu Kyi den election nung takok anguba tepela lemsateper

Myanmar opposition lenila, Aung San Suu Kyi (Tiyongtsü)-i Yangon yimti nung tentetba National League for Democracy (NLD) yimtenren telok tesepti nung o jembiba sülen NLD tesepti toktsüba noksa nung angur. (Yangon, November 11)

Yangon, November 11 (Agencies): Myanmar opposition lenila, Aung San Suu Kyi aser lai aniba National League for Democracy (NLD) yimtenren teloki tan agiba Myanmar parliamentary election nung mitkari nungitba Union Solidarity & Development Party (USDP) yimtenren telok den jenjang tajungba anguba atema pelaba olen ka Myanmar Tir, Thein Sein-i tanü Bodbar nü metetdaktsüogo.

“NLD yimtenren teloki tan election nung temaba jenjang anguba atema pelaba olen ka lemsatepba den külemi, NLD teloki tan election nung takok anguba osang jangjaba sülen Myanmar indang yimsüsütsü tashi melenzüktsü maparen tetsükdakba kecha majurui agitsü asoshi nungdakba maparen inyaktsü tenangzükba olen ka ozü Tir, Thein Sein tenüng nung Myanmar Information Minister, U YE Htut-i tanü metetdaktsüogo,” ta NLD telok otongar kati metetdaktsü.

Tanü tashi nung NLD teloki tan election nung bendenba vote noklang nung shilem 90 shi, parliament lower house indang menden 135 tashi anguba osang ka Myanmar nung tentetba Union Election Commissin (UEC)-i tanü metetdaktsüogo.

Tan election nung takok angur NLD yimsüsürtem rong nung Suu Kyi-a densema lir aser lai Yangon state künok Kawhmu constituency nungi tan takok anguba osang bushiteta lir.

Ano, UEC-i tan agiba election nung bendenba vote ajunga züngdangba sülen arok senden ka amentsü asoshi Suu Kyi-i Tir Sein ayongba osang ka Htut-i tanü metetdaktsü.

Tir Sien den arok senden amenba den külemi, Suu Kyi-i Myanmar parliament speaker, Shwe Mann aser Myanmar mitkar lenisang, Min Aung Hlaing na dena senden amentsü onük benokba osang jangjaogo.

Bendanger ka den kibong akümer aser pei chirnuri bendang senso agia alir ka nem Myanmar Tir menden abentsü temeten magütsütsü asoshi linük temzüng nung lateta aliba yong Britain nunger ka den kibong akümba den külemi, lar jabaso anapronglai Britain senso agia alila, Suu Kyi-i Myanmar Tir menden abentsü temeten monguteti lir.

Myanmar Tir menden abentsü temetenji mongutetaka, lai NLD lenir ka ama lar linük den sentakba nungdakba telemtetba ajunga agitsü renemba osang ka arishi küm 70 tain Suu Kyi-ia tanü metetdaktsüogo.