Myanmar Tir tasenba, Kyaw-i sorkar tasenba tentettsü onük benoker

Myanmar Tir tasenba, Htin Kyaw-i Nay Pyi Taw kübok parliament senden nung Myanmar sorkar tasenba tentettsü onük benokba sülen osangbener den ajurutepdang agiba noksa ka yangi angur. (Nay Pyi Taw, March 17)

Nay Pyi Taw, March 17 (Agencies): Myanmar Tir tasenba, Htin Kyaw-i ministry 21 aser minister 18 densemba sorkar tasenba tentettsü onük tanü, Brehostibar nü parliament nung benokogo.

Ethnic affairs ministry tasen ka tentettsü densemba onükji parliament yimsüsürtemi asüng, Hokolbar nü par senden nung benoka jembitsü sentong lir.

Tan benokba sorkar tasenba tentettsü onükji parliament-i agizükba sülen Kyaw-i aniba sorkar tasenba nung Cabinet minister 36 nungi 21 küma tajemba akümtsü.

Muslim Rohingya kin aser Buddhist Rakhine kin na tsüngda 2012 küm mangatettep adoka raratepba nem telangzüba agüja mitkartemi aniba Myanmar sorkari Myanmar anüdoklentip tsütsülen, Rakhine State nung alir Rohingya kin arishia parnok rishikangshiba osang bushiteta lir.

Aji oda, Rohingya kin den külemi, Shan, Bamar aser Kachin amala lisopurtemi ajurushiba timtem toushi reprangshidaktsütsü nükjidong nung Kyaw-i aniba sorkar tasenbai ethnic affairs ministry-ji tan asensa tentettsü onük benokogo.

Myanmar parliament-i tan Mongolbar nü agiba Myanmar Tir election nung Nobel sempet agizükla, Aung San Suu Kyi-i aniba National League for Democracy (NLD) telok nungi Tir candidate, arishi küm 70 tain Kyaw-i vote 652 nungi vote 360 ngua Myanmar Tir tasenba akümtsü jenjang angu.

Kyaw-i aniba sorkar tasenbai tan March ita 30 nü yimsüsütsü tenangzükba agiba sülen taruba April ita 1 nü nungi tenzüka Myanmar madak yimsü asü tenzüktsü.