N.I Jamir GHSS kaketshirtem nem tenüngsang agütsü

Mokokchung, May 6 (TYO): N.I Jamir Govt. Hr. Sec School Ongpangkong pur Hogulbarnü HSLC aser HSSLC takok angurtem nem tenüngsang agütsüba sentong ka par school kilem nung meraketa agiogo.
Taküm iba school nungi class 12 mezüng batch HSSLC tatidang agütsür parnok 8 liasü aser parnok ajaki takok angu aser HSLC nunga parnok 14 rongnung 11-i takok anguba osang ajanga metetdaktsü.
Sentong nung N.I Jamir GHSS management Board, mendenbula, EAC Livitoli Sukhalo-i jembidang, takoker ajak nem lai tenüngsang agütsü. Taoba lennirtemi iba school ya nükla tulu yur tenzükba ama iba nükla atalokdaktsütsü asoshi kaketshirtemi meranga azüngba den tesayurtemi nendak sayutsüla, ta laisa ayongzük.
School mapang yabo züba-zübar, kechiyong iba mapang nungbo tesayurtemi class nung sayuba den terenemjem agütsüba lesson dang azünger, saka shitakba takümji college züngzüker külen dang ajurutsüba lir, anungji, shinga daka teimla saka pei sasa temulungtetba yur meranga azüngtsü asoshi laisa ajungshia liasü.