N Jamir-i züluba ‘The Reluctant Daughter’ kaket saya

Mokokchung, Dec 1 (TYO): Aliba tsür N.Jamir-i English oshi agi züluba “The Reluctant Daughter” ta ser kaket tajung ka Mongulbarnü yangi Longkumer Kilem Mokokchung nung tesayur Narola Neizo-i meraketa sayatsüogo.
Iba kaket ya asen lokti nung shitakba atalokba otsü nungi ajemdaker züluba ka lir. Yangi tezüluri yimdangjem yimya nung tetsür tashiyim agi taküm raksatsür taküm aliba ka atishia lai ajangshiba timtem tuoshi indang shia angutsü.
Iba kaket nung tetsür tashiyim agi taküm raksatsürtemi ajangshiba tebang agi merasatetbatem rara, temai adoka tazüngertem mulung aka asodaktsütsü/tenük sakdaktsütsü teimla nung züluba onüktem angutsü.
“Iba kaket ajanga tetsür shirnok tashiyim agi taküm raksatsüba lendong ataloka lir parnok nem teimla ka agütsütsü nükjidong nung ibai züluogo”, ta kaket zülur N Jamiri mapang tatsüka agia jembidang lemsatep.
Lanuwa tsüraburi kaket azüngtsü ajungshia takok anguba mapang chiyungtsü masü tazüngtsü kaket dang senpet agütsü, yamaji lanuwa nungi azüngtsü – zülutsü jangrabangra arur tanü iba kaket ya züluogo ta laisa tsürabur nem tenüngsang agütsü.
Narola Neizo-i kaket sayatsüba mapang, o jembitsübo temela saka kaket ka küma zülutsüji mapa tasak aser tanü asen lokti nung kaket zülur nüngdakba mapang ka N Jamiri kaket tajung ka zülua adoktetba asoshi la nem mezüngbuba tenüngsang agütsü.
“Iba kaket ya ni ajak züngogo aser ibai azüngdang kü mulung nung kanga shishia ait, atangji, asen lokti nung iba ama tashiyim mapa atalokba ya tebilemtsü tulu lir” ta lai ashi. “Ibai tetsübutsü aketba merok mi amato lendong tulu lir” ta laisa shisem.
Anungji, tashiyim mapa dak sentakba asoshi asenoki telangzüba langkabo inyaktsü nüngdaker ta ashidang, “lendong agi menepa alirtemji asenoki junga anepalutsüla, meimtsüla aser teimla agütsütsüla” ta laisa tayongzük ka agütsü.
Iba kaket ya Mokokchung nung Clark Literature Centre, Student Book Centre aser Connect dokantem nung angutsü. Dimapur nung Ilando (online), O.M Book Store, Christian Literature House nungertem nung angutsü aser Kohima nung Bible House nung aser tang Hornbill benjong mapang kaket ayokba tesemtem nung angutsü. Kaket jenjang 300/- dang alitsü.