N K Keny: Dimapur nung mokokmeiner yarir

November 29, 2015 nü New Delhi nung Legal Services Day and Commendation Ceremony mapang NK Keny-i India Prime Minister Narendra Modi ket nungi sempet agizükba angur.

Dimapur, November 29 (TYO): Dimapur nungi arishi küm 49 tain N K Keny-i la school tanur asüdang nungi mokokmeinertem yariyonga arudar.
Keny-i meimchir atema aria bilemja mapa jenti inyaka arur aser ibaji ajiteta 2012 küm Dimapur District Legal Services Authority (DDLSA)-i la Para- Legal Volunteers (PLV) shim.
Iba sülen nungi lai DDLSA aser police den yaritepa arur aser laisa nisung shibelenba mesüra samaba ken o tem asoshi legal aid aser rescue mission teyari agütsür.
N K Keny-i National Best Para-Legal Volunteer (PLV) aser North East Zonal Best Para-Legal Volunteer sempet ana nguteta lir aser November 9, 2015 nü Legal Services Day amungdang India Prime Minister Narendra Modi-i New Delhi nung la nem item sempet agütsü.
Legal Services Day nü National Legal Services Authority-i National Best Para-Legal Volunteer (PLV) sempet agütsür aser taküm linük nung PLVs 18,263 rongnungi la Best PLV shimtet.
Deobarnü Dimapur District Legal Service Authority(DDLSA) office nung osangbener den sendaksemdang, Keny-i DDLSA aser state Legal Service Authority nem tenüngsang agütsüba metetdaktsü.
Laisa district administration, ozüng amertem aser tanga mulungtet teloktem dang parnoki yaritepba atema pelaba shisem.
Lai mapa aika inyaka aruba rongnung tongtipang karjii item ya liasü. Kidang nungi jena aoba tanur 15 tashi pei kibong den longjemdaktsü, tanur samaba ken o 21 nung yaritep, DDLSA den tetsür tashiyim agi shi nung medemba tatalokba 7 atema yaritep, kibok nung tashiyim mapa agi timtemer 9 den yaritep aser child labour inyaker tanur 11 kümzük.
Keny-i Darogapathar, Dimapur nung “Love Care Home” ta ser mokokmeinertem yaritsü atema ki ka lapoka lir aser iba nung tang kaketshir 18 lir. Tesüiba küm 12 tashi lai shinga dang nungi teyari magi kaketshirtem yariyonga arur.