N’ Korea den tesendaktep junga yangluogo: Trump

Washington, Rongchii 18 (Agencies) : CIA chief Mike Pompeo-i tangar nem memetetdaktsüi dang North Korea tonga oagi Kim Jong Un den ajurutepogo aser temaba jenjang nung senden amentsü atema parnok den tesendaktep junga yangluogo, ta tanü Rasemnü US Tir, Donald Trump-i metetdaktsü.
Taoba hopta nung Mike Pompeo-i North Korea den ken o jembiogo aser taruba ita ishika tsüngda Tir menden nung senden amentsü atema tang nungi tejangja inyaktepdagi, ta Twitter ajanga Trump-i metetdaktsü.
“Nuclear oset meyanglutsüji Alima atema dang masü saka North Korea asoshia tongtibang maparen,” ta par Florida state nungi Trump-i züluja lir; tang iba kasa tesem nungji Japan Ato Kilonser, Shinzo Abe aruagi lir.
Temaba jenjang nung senden amentsü atema renemshia tang US aser North Korea tsüngda indang-indanga ken o jembidagi.
Paisa ashiba agi, Aami (June) ita tetenzüklen akatsü ta bilemba sendenji kong akatsüar tang tesem pongu shimteta ibaji asameyangdagi.
Secretary of state inyaktsü shimteter mapang tatsüka tsüngda Pompeo-i North Korea lenir ajuru, ta Washington Post nung mezüngbuba iba indangji sangdong.