N Korea den toktepa Japan-i defence budget timtiba agizük

Tokyo, December 22 (Agencies): North Korea nungi amokmerenba den tokteptsü asoshi Japan-i defence budget billion $46 agizükogo.
Japan-i defence budget nung sen timba indokba ya Kim Jong-un-i aniba linüki ballistic missile tem takok ngua tendangba sülen Japan indang missile range renlokba nung amshitsü atema lir.
Iba sen ya 2018 küm Japan linük indang sen Yen trillion 96.71 budget yangluba nung densema lir.
North Korea indang tebilemtsü tali akümba den China indang tzüyim mitkartem renlokba mapang ka nung Ato Kelonser Shinzo Abe indang sorkar ajanga Japan defence tashi renlokogo, aser US-i yangluba ‘land-based Aegis missile defence system’ benoka amshitsü mechi budget nung sen Yen million 730 anüngzüka yua lir.
Iba ajanga tang Japan kabu nung aliba missile tem nung tali bendenloksemtsü aser item rongnung Standard Missile-3 interceptors aliba Aegis destroyer aser Patriot Advanced Capability-3 interceptor tem densema lir.
Japan-i missile interceptor tajungba alizüktsü asoshi sen Yen billion 44 shi lemzükja lir.
Japan indang air defence command aser control system tajungba küma yanglushitsü atema sen Yen billion 4.7 lemzüktsü.
F-35A stealth fighter jet terok alisemtsü asoshi Japan sorkari sen Yen billion 78.5 indoktsü aser V-22 Ospreys pezü alisemtsü asoshi sen Yen billion 39.3 indoktsü.
Meta kilometer 900 tashi aotsü akokba Lockheed Martin Corp.’s Joint Air-to-Surface Standoff Missile aser Long Range Anti-Ship Missile amenoktsü atema research agitsü asoshia sen Yen million 30 lemzükja lir.
Maneni Japan-i 3,900-ton destroyer rong tulu ana yanglutsü asoshi sen Yen billion 92.2 aser submarine yanglutsü asoshia sen Yen billion 69.7 lemzükja lir.