N Korea-i anünglak terenlok alitsü alizüng yua lir: Kim

Kim Jong-UnPyongyang, February 19 (Agencies): North Korea linüki anünglak terenlok alitsü alizüng ayuba osang ka N Korea lenisang, Kim Jong-Un-i tanü, Hokolbar nü metetdaktsüogo.

“Tanü putu nung anünglak terenlok alitsüji kanga dang tongtipang,” ta shia, par N Korea linüki tarutsü mapang nung anünglaki satellite balala kaketa yoktsü sentong renemba olen ka Kim-i metetdaktsü.

“Anünglak terenelok alitsüji ozü Democratic People’s Republic of Korea (DPRK) alizüng lir aser tan February ita 7 nü anünglaki satellite takok ngua kaketa yoker scientist-tem nem tenüngsang agütsür,” ta pai ashi.

Kim-i tawa anünglaki satellite takok ngua kaketa yoker scientist-tem nem medal, sempet aser Kim yimli nung lenir, asür Kim Il-Sung o Kim Jong-Il na tenüng ajenokba anütetsü agütsüba osang ka Pyongyang-i ketdang asüba KCNA news agency-ia jangjashitsüogo.

Ajisüaka, N Korea-i anünglaki satellite kateta yoktsü nung atemer par tongpang nung amshitsü ballistic missile-tem tendanger ta kidangsüa aliba linüktem den külemi, West lenirtemi Pyongyang dak temulung melemteti lir.

United Nations (UN) ashi mangai, Pyongyang-i par 4 buba nuclear tongpang oset tendanger ita ka shi lir külen par linüki Kwangmyongsong-4 satellite-ji anünglaki kaketa yok.

Pyongyang-i tawa nuclear tongpang oset tendangba den külemi, rocket anünglaki kaketa yokba sülen par linük anema taoba mapang nungi tesashiba tenokdangba sentong benoktsü asoshi US aser par linük pusemba South Korea o Japan nati UN Security Council ajungshitsü tenzüka lir.

Tongpang nung amshitsü technology aser osettsüset Pyongyang dang mayoktsü aser metetsümonga N Korea nung nübur temeten anema inyakba maparen nung shilem magitsü densema, US Tir, Barack Obama-ia N Korea anema tenokdangba sentong tasen ka yashi, Brehostibar nü benokogo.

You must be logged in to post a comment Login