N. Korea-i Latin America linüktem dang tesentaktep meraksatsü mepishir

Seoul, August 19 (Agencies) : Hokolbarnü North Korea-i Latin America linük aika dang parnok den tesentaktep meraksatsü maneni mepishi aser Washington-i tawa item linüktem dang Pyongyang den tesentaktep kecha mayutsü ashiba aitsü.
Tawa US Vice President Mike Pence-i Santiago semdangba mapang pai Chile, Brazil, Mexico aser Peru linüktem dang North Korea den diplomatic aser shishilemba tesentaktep aliba ajak anentsü asoshi yimjak nung metetdaktsü.
North Korea Foreign Ministry nung otongdar kati osangbenertem dang ashiba agi, US-i iba ama yimya amshiba ajanga parnok dak tebilemba tamajung aliba temai adoka metetdaktsür.
Pai, US-i iba o jembiba ajanga Washington-i sovereign state tem inyakyim nung amuokba aser international ozüng raksaba sayur, ta ashi.
North Korea ketdangserisa ashiba agi, Kim Jong-u-i aniba linüki tanga linük ajunga den temba ayimba yimya, yimjung aser inyaksangshi ajak nung maneni tesendaktep tajungba akümtsü merangtsü.
North Korea otongdari, US-i tetshiba linük pezü dang Washington-i benokba onükji magizüktsü mepshi kechiba süra parnoki ibaji angara US-i linük tebilemtsü nung amushiba menokdangtettsü, ta ashi.
August 5, 2017 nü North Korea-i intercontinental ballistic missile tendangba ajanga UN-i parnok anema sanctions tesashi ka sangdong. Iba sanction ya tang tashi nung North Korea anema sanction tesashitiba lir.