N Korea-i long range nuclear missile tendangtsü amokmerener

Seoul, March 15 (Agencies): North Korea lenisang, Kim Jong Un-i tongpang nung amshitsü nuclear warhead bentetba long range ballistic missile tarutsü mapang tendanga kadoktsü amokmerenba olen ka tanü, Mongolbar nü metetdaktsüogo.
United Nations (UN) densema, alima linüktemi par nuclear mapatong anentsü ajungshiba anema inyaka sayua, Kim-i tan par missile tarutsü anogotem nung tendanga kadoktsü osang amokmerena metetdaktsür lir.
Par linüki tongpang nung amshitsü nuclear tongpang oset yanglua mali ta temulung melemi bilemertem dang shitakbasa nuclear tongpang oset yanglua rizünga lir ta sayutsü nükjidong nung Pyongyang-i par nuclear missile-tem tendanga kadoktsü sentong renemba osanga angazükogo.
“Anünglaki kaketa yokba ballistic missile-tem alimai tanaben meyipa aludang amshitsü asoshi renemba tatsük koktetba osettsüset tendanga sayudang Kim-i tarutsü mapanga nuclear aser missile osettsüsettem tendangtsü ozüng agütsü,” ta sorkari ketdang asüba Korean Central News Agency (KCNA)-i osang jangjashitsü.
“Par linüki nuclear tongpang osettsüset amshia par linük anemer linüktem den tongpang raratsü tashi lir ta sayutsü nükjidong nung N Korea-i nuclear warhead pokdaktsütsü tetendangbaren aser ballistic missile tapu ishika anogo ishika tsüngda nung tendangtsü sentong renema lir,” ta KCNA-i shisem.
Ajisüaka, Pyongyang-i United Nations Security Council (UNSC) telemtetbaren anema inyaka, par nuclear tongpang oset aser missile-tem metendangtsü tajungshiba olen ka South Korea aser Japan napronglai metetdaktsüogo.