N Korea-i maneni ballistic missile 2 tzüyim nung kadoker

Seoul, March 18 (Agencies): United Nations (UN) densema, alima tashi abenba linüktemi par linük anema tenokdangba sentongtem benokba anema inyaka sayua, North Korea-i par ballistic missile 2 tashi Sea of Japan nung tanü, Hokolbar nü kadokogo.

Pyongyang-i par linük anüdoklen densemba tzüyimkümlen nungi Rodong ta ajaba medium range ballistic missile 2 kadokba sülen missile ka anüng tum nung pokdok aser tanabuba missile kilometer 800 shi tonga ao tzüyim nung poksaba osang jangjaogo.

Ajisüaka, tanü kadokba missile anaji US aser par linük pusemba linüktem nem timtem bener arütsütsüsa tashi abenba missile masüba osanga angazükogo.

US-i N Korea lenisang, Kim Jong Un-i aniba sorkar anema tenokdangba sentong tasen benokshiba osang ka yashi, Brehostibar nü alima dang sangoktsüba sülen Pyongyang-i tan par missile-ji kadoker lir.

Tan missile kadokba ajanga Pyongyang-i UN Security Council (UNSC)-ia agia aliba Pyongyang-i tongpang nung amshitsü nuclear aser ballistic missile yanglua kasaji mekadoktsü tenokdangba benoktsü telemtetba anema inyaker lir.