N Korea-i missile tendanga mekadoktsü asoshi S Korea o Japan nati amokmerener

Seoul, February 03 (Agencies): North Korea-i par long-range rocket tendanga mekadoktsü amokmerenba olen ka Japan aser South Korea nati US den aroki lungjemer tanü, Bodbar nü metetdaktsüogo.

“N Korea-i par rocket tendanga kadokba ajanga United Nations (UN)-i par linük anema benokba tongpang nung amshitsü ballistic missile aser nuclear osettsüset tendanga kasaji rizüngtsü tenokdangba anema inyaker asütsü,” ta shia, linük asem lenirtemi missile tendanga kadoktsü maparenji meinyaktsü asoshi amokmerenogo.

Pyongyang-i par ‘Earth observation satellite’ ka tan February ita 8-25 nü tsüngda anünglaki kaketa yoktsü sentong renemba osang ka UN dang yasüng, Mongolbar aonung metetdaktsüba sülen Japan, S Korea aser US linüktemi iba maparen meinyaktsü osangji tanü sangoktsür lir.

Anünglaki rocket kaketa yokba ajanga par anünglak mapatong rendaktsütsü temeten lir ta Pyongyang-i metetdakja lir.

Ajisüaka, Pyongyang-i anünglak mapatong rendaktsütsü tatemtsü yur par ballistic missile aser nuclear osettsüset tendanger ta Japan Ato Kilonser, Shinzo Abe-i metetdaktsüogo.

“Pyongyang-i par missile tendanga kadokba ajanga UN kübok Security Council telemtetba anema inyaker akümtsü,” ta shia, Abe-i par Japan amokmerentsütsüa Pyongyang-i kadokba rocket ajunga anüng nungi kazüka yoktsü ozüng par mitkar lenirtem nem tanü agütsüogo.

UN-i par linük anema tenokdanga benokba anema inyaka, Pyongyang-i 2012 küm December ita par long-range rocket ka tendanga kadokba sülen taoba January ita 6 nüa hydrogen bomb ka tendanga pokdaktsüba osang bushiteta lir.

Ano külen, N Korea-i par rocket anünglaki kaketa yoktsü sentong renemba osang angazükba sülen China-ia tebilemtsü akaba osang ka China Foreign Ministry otongdar, Lu Kang-ia tanü metetdaktsüogo.

“Pyongyang-i alima ashi anga par rocket mekadoktsü ajungshir,” ta Kang-i tanü ajungshia ashi.

Pyongyang-i tawa par nuclear oset tendangba sülen par nuclear mapatong anentsü ajungshitsü asoshi US aser par linük pusemba linüktemi China ajungshitsü tenzüka lir.