N Korea-i missile tendangba maparen aitsür: UNSC

United Nations, August 27 (Agencies): North Korea linüki tongpang nung amshitsü ballistic missile tesüsa kadoka tendangba maparen aitsüba olen ka United Nations Security Council (UNSC)-i metetdaktsüogo.
“N Korea-i par tongpang nung amshitsü missile kadoka tendangba ajanga par linüki alima temzüng ozüng alema inyakogo,” ta shia, alima linük 15 züngsemba UNSC-i yashi, Hokolbar nü sangoktsü.
“UNSC-i Pyongyang’er inyakyim maneni tendangtsü aser par linük nem tapet telangzüba agütsütsü renema lir,” ta par tenteti metetdaktsü.
“N Korea nübur meyirijang jenti tebang agi meshitetba timtem toushi ajurua aliba yutsür, par sorkari ballistic missile-tem densema, tongpang nung amshitsü osettsüset yanglua kasaji tendangtsü atema par linük rongsen lalur,” ta UNSC-i aija ashi.
N Korea pusema nungtiba linük, China-ia tan Pyongyang-i par tongpang nung amshitsü missile tendangba maparen aitsüogo.
Pyongyang-i par mitkar submarine rong ka nungi kadoka par ballistic missile tendangtsü maparen tan Mongolbar nü agia liasü.
Par linüki Japan tsütsüleni kadokba missile-ji Pyongyang-i par submarine nungi missile tan mezüngsüa takok ngua kadokba osang bushitetogo.
UN-i benokba tenokdangbaren anema inyaker ta sayutsü nükjidong nung Pyongyang-i par tongpang nung amshitsü nuclear osettsüset aser missile ishika taoba ita ishika tsüngda tendanga kadoka osanga bushiteta lir.
“N Korea-i par missile kadoka tendangba maparenji tai metoktetba aser rara menatsü maparen lir,” ta Japan Ato Kilonser, Shinzo Abe-ia metetdaktsüogo.
“US aser par linük pusemertemi ozü linüki missile kadoka tendangbaji UN telemtetba anema inyaker ta shia, iba ken o UNSC nung benokogo. Ajisüaka, iba maparenji aibelena alir kati metena alir ka aitsür mesüka lir,” ta North Korean Foreign Affairs Ministry ketdangser, Jon Min Dok-ia par linük metentsüba olen ka tanü, Honibar nü sangoktsüogo.