N. Korea-i nuclear, missile sentong manener: UN miim osang

United Nations, Luroi/August 04 (Agencies): United Nations-i tenokdangba agütsüba nung aibelena North Korea-i nuclear aser missile sentongtem tang tashi manen, ta UN miim osang ka Rogonü Reuters ajanga anguba nung shia lir.
UN-i tenokdangba agütsüba ama North Korea-i inyaker asü masü, ta mongintemi ita trok asadanga bushir Security Council North Korea sanctions committee nem Rononü menur agütsü.
“Security Council temzüng den toktepa North Korea-i nuclear aser missile sentongtem maneni inyaker, kong parnoki (North Korea) 2018 nunga miimshia petroleum product tem rong nungi rong kati belenba tali kümogo aser mijang (coal) dena tzüyim nung abener,” ta mongintemi kaket tapak 149 nung zülua aliba osang nung shia lir.
Iba report nung ajemdaker telangzüba agütsütsü asoshi North Korean mission to the United Nations dang asüngdang, saka telangzüba magütsü.
North Korea-i mitkartem tsütsü Syria den angatetteper aser Yemen nung aliba Houthis tem dang raraba oset ayoktsü meranga arur, ta UN report nung shia lir.
Mongputeni/October 2017 aser Metsüremi/March 2018 tsüngta Pyongyang-i textile ban nunga aibelena sen million $100 dak tali alang oset balala China, Ghana, India, Mexico, Sri Lanka, Thailand, Turkey aser Uruguay dang ayok, ta iba report nung shia lir.
Aami/June nung US Tir, Donald Trump aser North Korea lennir, Kim Jong Un na mezüngbuba ajurutepa nuclear sentongtem meshi meshia anentsü atema inyaktsü ta Kim-i nangzükba sülen iba linük nung tenokdangba agüja aliba tera tajemba küma salatsüla, ta Russia aser China-i Security Council nung benokba mapang iba report ya arur alitsü.
Pyongyang-i mapa küma meinyak tashi tenokdangba tesashi alitsüla, ta United States aser tanga council züngsemtemi shia lir.
Miima rong ka nungi rong kati petroleum osettem international tzüyim nung belenba ajanga tesem aisü nung renlokogo, ta UN mongintemi ashir. North Korea nungertemi aiben ship’s tracking system ya shibanga ayur, saka tangbo rongtem ya yimya balaka nung amshir aser rong tilatema amshir, ta osang nung shia lir.
Pyongyang indang nuclear aser ballistic missile tem yangluba sentong nung senotsü lenmang shibangtsütsü mechi Security Council ajanga mulungsoa 2006 küm nungi tenzüka North Korea nungi mijang (coal), iron, lead, textile aser tzüyim nungi anguba chiyongtsütem alizükba nokdanga lir aser iba den külemi crude oil aser petroleum osettem par linük dang ayoktsüa nokdanga lir.
Syrian Arab Republic den mitkar tsütsü tesendaktep nokdangba ya maneni angatettepa inyaker, ta mongintemisa ashir. North Korea indang ballistic missile aser nokdanga aliba tanga mapatem nung inyaker technician temi Syria ya 2011, 2016 aser 2017 nung semdang, ta parnoki ashir.
North Korean Ministry of Military Equipment aser Korean Mining Development Trading Corporation (KOMID) ajanga raraba oset tajungtem aser ballistic missile tem Yemen nung aliba Houthi telok nem agütsütsü merangba indang bushisüngdang südagi, ta UN report nungsa shia lir.
Technology agütsütsü aser tejangraba kasa indang ken o jembitsü asoshi Houthi lenniri North Korea nunger ya Damascus nung ajurutsü jaoka Chiteni/July 13, 2016 nung züluba shidi ka mejangjaba linük kati mongintem dang sayu, ta osang nung shia lir.
Tangari memetettsüsa maparen balala inyakba ajanga North Korea nem senotsü tenokdangba agüja aliba nung tetsükdaktsü majurur, ta mongintemi ashir.