N Korea-i par nuclear mapatong anentsü ajungshir: Russia & China

Moscow, March 11 (Agencies): North Korea-i alima tashi abenba linüktem den tanaben senden mena, par tongpang nung amshitsü nuclear osettsüset yanglua tendangba aser kasaji rizüngba mapatong anentsütsü tajungshiba olen ka Russia aser China nati tanü, Hokolbar nü metetdaktsüogo.

N Korea-i United Nations (UN)-i latetba telemtetbaren anema inyaka, par short-range ballistic missile 2 tashi tzüyim nung yashi kadoka sayuba sülen Russia Foreign Minister, Sergei Lavrov aser China Foreign Minister, Wang Yi nati tanü Russia yimtiba, Moscow nung senden mena osangbener den ajurutepdang iba olenji sangoktsü.

“Pyongyang-i tenzükba nuclear mapatongji khen yongji magizüktetba mapatong ka lir,” ta shia, par linüki UN Security Council (UNSC)-i lemtetba ama, tongpang nung amshitsü osettsüset yanglua kasaji tendanga mekadoktsü aser rizünga mayutsü asoshi lenir anati tanü ajungshi.

“Pyongyang-i tenzüka aliba nuclear mapatongji ozü China linüki magizüker. UN-i lemtetba ama, Pyongyang-i par nuclear mapatong anenadoktsüla,” ta Wang-i metetdaktsü.

N Korea-i short-range missile jenti rizünga ayuba den külemi, par linüki long-range aser intercontinental missile-tema yanglutsü tenzükba osang bushitetogo.

Ano külen, N Korea lenisang, Kim Jong-un-i par ballistic missile tendanga kadokba maparen reprangshiba sülen tan kadokba den tajungba missile yanglutsü ozüng agütsüba osang ka sorkari ketdang asüba KCNA osangia tanü metetdaktsüogo.

“UN-i nuclear tongpang osettsüset yanglua metendangtsü asoshi Pyongyang anema benokba tenokdangbaren mapa küma inyaktsüla,” ta Wang-i nenshia ashi.

“N Korea-i alima ashi mangai par tongpang nung amshitsü nuclear osettsüset yanglua kasaji tendanga kadokba atema par linük pusemer shinga malitsü ta angatettsüla,” ta Lavrov-ia metetdaktsü.

Ano, US-ia par tongpang nung amshitsü missile system South Korea nung amenoktsü sentong renemba atema Wang aser Lavrov nati US linüka aitsüba osang jangjaogo.

“US-i Korean peninsula nung nungdakba den timba missile system S Korea nung amenoktsü sentong yanglur aser yamaji inyakba ajanga Korean peninsula nung tensa tamajungba kümdaktsütsü,” ta tenati tekümdangtsü olen ka sangoktsü.