N Korea-i tenokdangba benokbaren nungi angazüktsü ajungshir: Russia

United Nations tesepti, New York nung amenba United Nations Security Council (UNSC) senden nung UNSC züngsemtemi pei teka metonga North Korea anema tenokdangba sentong benoktsü onük agizükba noksa nung angur. (New York, March 03)

 Moscow, March 03 (Agencies): United Nations (UN)-i tan tesüsa tenokdangba sentong benokba maparen nungi North Korea-i tangazükba tajung agitsü tajungshiba olen ka Russia-i tanü, Brehostibar nü metetdaktsüogo.

N Korea-i UN aser alima ashi mangai par 4 buba tongpang nung amshitsü nuclear oset tendangba den külemi, anüngleni rocket kaketa yokba sülen UN-i Pyongyang anema tenokdangba sentong tesashi benoktsü asoshi yashi, Bodbar nü lemtetogo.

“UN-i tan tenokdangba sentongtem benokshiba nungi tangazükba tajung agia, Pyongyang-i par nuclear tongpang osettsüset yanglua kasaji rizüngba maparen anentsü asoshi alima tashi abenba linüktem den jembitsü mulungtettsü imlar,” ta Russia’er foreign ministry-i metetdaktsü.

“UN-i Pyongyang anema benokba tenokdangba sentongtem rong nung tan tesashitiba benokogo Ajisüaka, yamaji inyakaba ajanga dang Pyongyang-i Korean peninsula nung tensa tajungba kümdaktsütsü asoshi mulungtettsü akok,” ta ministry-i ashi.

N Korea-i UN-i benokba tenokdangbaren ajunga züdoka taoba küm 10 tashi par nuclear tongpang oset aser missile balala yanglua kasaji tendangba osang bushiteta lir.

Ano, Korean peninsula nung tensa mejungi mekümdaktsütsü mechi US-i par missile defence system South Korea nung mamenoktsü asoshi Russia-i nenshia metetdaktsüogo.

N Korea-i 2006 küm nungi tenzüka par tongpang nung amshitsü nuclear osettsüset yanglua kasaji tendangtsü tenzükba sülen UN-i Pyongyang anema tan agi 5 buba tenokdangba sentong benoker lir.