N Korea-i US-Seoul nati mitkar terenemshitsü sentong magitsü amokmerener

Seoul, February 23 (Agencies): South Korea aser par pusemba linük, US nati kümshi agiba ama, taruba March ita agitsü renemba teloktep mitkar terenemshitsü sentong magitsü asoshi North Korea-i tanü, Mongolbar nü amokmerenogo.

US o Seoul nati kümshi agiba teloktep mitkar sentongji par linük anati tongpang raratsü asoshi terenemshiba agir ta shia, par linüki tapet telangzüba agütsütsü ta Pyongyang-i kümshi amokmerena arur.

“Ozü linük indang mitkar tashi ajunga amshia, US aser S Korea nati agiba mitkar terenemshitsü sentong nem tapet telangzüba agütsütsü. Ozü N Korea amokmerentsüa par linük anati inyakra, ozü mitkar züngsem tatembangba tashi taküm bendanga agüja US o Seoul na anema raratsü,” ta N Korea lenisang, Kim Jong Un-i metetdaktsü.

N Korea mitkartemi par missile-tem kalokja S Korea’er presidential Blue House aser US-i par linük aser Asia na nung tentetba mitkar teseptema amaktsü amokmerenba olen ka Kim-isa metetdaktsüogo.

You must be logged in to post a comment Login