N Korea lenisang, Kim temaba jenjang nung ajungkettsütsü renemer

Pyongyang, May 07 (Agencies): North Korea indang yimsütsü tashi benokba Workers’ Party of Korea (WPK) yimtenren teloki otsüsütsüa tanü, Honibar nü agi anogo 2 buba lokti senden amendang par lenisang, Kim Jong Un temaba jenjang nung ajungkettsütsü lemtetba osang jangjaogo.
“Kim temaba jenjang nung ajungkettsüba ajanga tang First Secretary menden abensang, Kim-i tebou-i taküm alidang abenba WPK nung General Secretary menden den sako menden abener akümtsü,” ta N Korea sorkari ketdang asüba Korea Central News Agency-i osang jangjashitsü.
Kim-i tan abenba lenisütsü menden den temaba menden abentsü maongka anguba ajanga pai par N Korea amokbanga ayutsü tashi anguba kuli alima dang sayur lir.
Ano külen, N Korea-i tarutsü anogotem nung maneni nuclear tongpang oset tendangtsü sentong renemba osang ka US nung tentetba telok, 38 North-i metetdaktsüogo.
Pyongyang-i tentetba nuclear tongpang oset tendangdak taoba mapang nungi mapa tesashiba inyakba noksa tan May ita 5 nü satellite ajanga tangokba ajanga iba osangji jangjaba olen ka N Korea tendanger telok, 38 North-i metetdaktsü.
Küm 36 tsüngda nung tan mezüngsü amenba WPK lokti senden den sentaktepa, Pyongyang-i par 5 buba nuclear oset tendangtsü akok ta par linük dak temulung melemteti South Korea-ia lendong ajurutsü renemshiba osang angazükogo.
“N Korea-i taküm January ita tendangba densema, taküm 2016 küm tenzüker tanü tashi nung tongpang nung amshitsü nuclear oset ishika tendangogo aser ibaji ajanga asen linükia alima jenjang nung tongpang osettsüset yanglutetba kuli angur,” ta WPK senden tenzüktsüdang Kim-ia metetdakja liasü.
Ano külen, alimai N Korea anema benokba mozü mora den sentakba tenokdangba sentongbo agientsü asoshi Nobel sempet agizükertemi tanü ayongzükogo.
Nobel sempet agizükertemi N Korea semdanga par linük tentetba mozükitem semdanga senzüba sülen iba tayongzükba olenji metetdaktsü.
“Alimai N Korea anema tenokdangba sentongtem benoktsü tenzükba sülen Pyongyang nung mozü mora agütsübaren aser tashidak balala aneptsütsü asoshi research agibaren kanga tekupokba jenjang nung aliba osang bushitetogo,” ta Chemistry indang Nobel sempet agizüker, Aaron Ciechonover-i China yimtiba, Beijing nung osangbener den ajurutepdang metetdaktsü.
Norway, Britain aser Israel nungi Nobel sempet agizüker 3-i N Korea semdanga par linük hopta ka shi amongba osang jangjaogo.