N Korea nuclear linük ka mekümdaktsütsü: Obama & Park

South Korea Tir, Park Guen-hye (Abelen) aser US Tir, Barack Obama nati Washington kübok White House nung osangbener den yashi Hokolbar nü ajurutepba noksa nung angur. (Washington, October 17)

Washington, October 17 (Agencies): North Korea nuclear linük ka kodanga mekümdaktsütsü azüngashiba olen ka US Tir, Barack Obama aser South Korea Tir, Park Geun-hye nati yashi Hokolbar nü metetdaktsüogo.
Ajisüaka, N Korea-i tongpang nung amshitsü nuclear osettsüset yanglua kasaji rizüngba maparen koma nokdangtsü iba osangbo tenati memetetdaktsü.
Obama o Park nati yashi Washington kübok White House nung ajurutepa senden ka amenba sülen tenati aroki osangbener den ajurutepdang iba olenji metetdaktsü.
Alima tashi abenba linüktem aser Iran na tsüngda taküm küm tumlen agiba nuclear tezüngzüktep dak ajemdaker Pyongyang’er nuclear sentonga anentsütsü asoshi lenir anati yashi senden nung onük benokba osanga jangjaogo.
Ajisüaka, Pyongyang-i par nuclear sentong anentsü bilemba olen ka danga tanü tashi alima dang metetdakja mali.
“N Korea-i peisasa par nuclear sentong anentsü temulungtetbaji ayutsü nungdaker,” ta Park-i yashi metetdaktsü.
Korean peninsula nung tensa tajungba kümdaktsütsü nükjidong nung Pyongyang’er nuclear sentong anentsütsü asoshi Seoul o Washington nati külemi lungjemer nungdakba maparen inyaktsü renemba olena lai metetdakja liasü.
“N Korea-i par nuclear osettsüset amshia tashiyim inyakra, ozü US o S Korea nati tapet telangzüba agütsütsü ta taoba mapang metetdakja lir. Ano, par linüki nuclear sentong tenzükba ajanga tanüngba alima linüktem den tesendaktep raksar ta angatettsüla,” ta Obama-ia sangoktsü.
Park-i taküm küm tumlen Washington semdangtsü sentong renema liasü saka lar linük MERS tashidak adokba yong lai iba sentongji thinena lir külen tan ang Washington semdanger lir.