N.Korea nungeri Kim Jong-nam asüba memeteti liasü

Seoul, February 17 (Agencies) : North Korea nungertemi par lenir Kim Jong-un tedi asüba memeteti liasü kechiba süra linük telungi bendanglen aser tanga tesem nungi osang tsüsang aitba ajak nokdanga lir, ta Hokolbarnü osangbenertemi ashi.
Ozüng yamaji liakasa North Korea nunger aika ket nung tanga tesem nungi osang tsüsang agitepba kechisarena peria lir anungji item ajangaji pa asüba osang khen lirbo ajaki meteta aküm,” ta osang ajanga ashi.
Tesüiba mapang linük lenir, asür, Kim Jong-il’er jabaso tambusang Kim Jong-nam ya Hombarnü Malaysia tayimtsü anenba tesem nung tetsür anati miim mozü chidaktsür tepset ta temulung melemi bilemba osang benertemi ashi.
Iba tasüba ya North Korea nungeriang inyak asü ta bilema aliba mapang Seoul intelligence agency-i, 2011 küm Kim Jong-un linük lenir akümba sülen par adianu tepsettsü tetuyuba agütsü, ta temai adoka ashi.
North Korea nunger aikati Kim asüba mesüra Kim Jong-nam ji shiba-ar jangja memetet, ta osang ajanga ashi. Aser ibaji ajanga Kim Jong-un-i pa adianu indang osang ajak miimbanga ayuba sayur.
“Nibo iba osang mangashi. Ato Kim Jong-il’er jabaso ana rongnung Kim Jong-un tambu masü na,” ta China arrtsülen alir North Korea nunger kati ashi.
US nung amenoka aliba media Radio Free Asia (RFA)-i, North Korea nung party balala nung lenirtem dena nüburtem ajaki par linük nung lenir indang adianuji tebu sor küm 75 ajungtsü anasa asü ta mejangjai liasü, ta ashi.
South Korea military temi Korea linük ana arrtsülen loudspeaker amshia North Korea nema Kim tepsetba osang metetdaktsütsü aser ibaji ajanga Norh Korea nungeri nisung tepsetba temai adoka jangjatsü, ta South Korea sorkar sangdong ka ajanga metetdaktsü.
Kim Jong-nam ya senmanger amai züngshia liasü, ajisüaka 2001 küm pai passport taila bener Japan-i aitsü merangba ajanga tebu den mangatettep adoker küm aika bendanglen lia jaja.
Lenir Kim-Jong-un lenisüba kübok December 2013 nung tesüiba mapang linük nung lenir tajung, Kim-Jong-un tebu tanubo, Jang Song-thaek tepseta intokba sülenbo tang Kim asüba ya kanga süngmangtepba tatalokba ka lir.
Malaysia police-i Kim tepsetba dak sendakba nung tetsür ana dena parnok nisung asem pua lir.
Pa tasümang senaa reprangba osang ano khen lirang metetdaktsütsü imlar.