N-Naga DAO purtemi HIV nokdangtsüba sen meshir

Nagaland nung HIV aser AIDS nokdangtsü atema NACO-i senotsü magütsüba anema N-Naga DAO-i anir melungtet telok balala nungi züngsemtemi Kohima nung longkak aitba noksa nung angur. (Kohima, November 10, 2016).

Kohima, Nov 10 (TYO): Nagaland nung government mapa inyakertem nem ita sen magütsütetba dang masü saka HIV aser AIDS nokdangtsüba mapatem asoshia sen magütsütet kümogo aser iba timtemji National AIDS Control Organisation (NACO) nem metetdakja tanü Network of Nagaland Drugs and AIDS Organisation (N-Naga DAO) teloki Kohima nung longkak aitba sentong ka ayongzüka agiogo.
Parnokisa ashiba agi, Nagaland nung HIV aser AIDS nokdangba mapatem inyakba asoshi sen magütsüi lir.
Tanü iba longkak aitba sentong nung N-NAGA DAO kübok HIV aser AIDS nokdangtsü atema inyaker mulungtet telok balala nungi nisung noklang dak tema adenshir Chief Minister office tashi oa liasü.
Parnokisa parnoki inyakba mapa atema sen agütsütsüla aser joko tiyazü tenangzükba magütsütsüla kechiyong mapang shitak nung sen agütsüba agi HIV aser AIDS nokdangtettsü ta metetdaktsü.
Item nüngdak aser takangbatemji shia Chief Minister, T R Zeliang nem tezüluba nung agütsüogo. Parnokisa iba maparen nung inyaker mulungtet telok ajak nem December 2015 nungi March 2016 tashi tangutsü aliba senotsü ajak agütsütsüla ta metetdaktsüogo.
Parnokisa ashiba agi, HIV aser AIDS nokdangtsü atema inyakba asoshi mulungtet telok Non-Governmental Organisations (NGOs) kübok inyakertem nem ita sen magütsüteti timtem nung lir. Iba atema NACO aser Nagaland State AIDS Control Society (NSACS) na tsüngda kati ka aitsüteper aser idangji NGO nung inyakertembo kanga timtem angur aser HIV nokdangtsüba mapa meinyakteti shisabolu tia nung lir.
Chief minister ya NSACS nung mendenbuba lir, anungji N-Naga DAO teloki pa dang tang tashi magütsüi aliba sen ajak agütsütsüsa lenmang bushidaktsüner ta mepishia metetdaktsüogo.