N.U bangdaki tim mapa meinyakba atema NUTA (L), CEC NUTA & PGSU-i tejashiba sayua longkak ait

Lumami, June 1 (TYO): May 19, 2016 nü Ao Settsü yim lushi nung mejangjaba telok kati Nagaland University nung tesayurtem, kaketshir aser yangji inyakertem lenmang nung sota amokmerena tekasangshiba den gari raksatsüba anema Nagaland University bangdaki tim mapa kecha meinyakba agi tejashi sayua Bodbarnü Nagaland University Teachers Association (NUTA-L), Central Executive Council NUTA (L) aser Post Graduate Students’ Union (L)-temi ayongzüka longkak ait.
Tanü tesayurtemi tejashiba sayua badge tanak ka inok aser shitipaktem nung “onok kümzüka liner”, “tesayur amokmerenba anenang”, “ochi obendang menubaji ochi magizüker” ta yamaji ozülu balala zülur longkak aita liasü.
Iba maparen dak sentakba nung Nagaland University bangdak dang mejangjatetba telok anema tim mapa inyaktsü asoshi tezüluba nung agütsü, aji saka, tanü tashi bangdak nungi telangzüba kecha mali, ta NUTA (L) tir Dr. Lanusashi Longkumeri osangzülurtem den jembidang metetdaktsü.
“Onok nisung kar anema noktaker masü saka iba amai memetetba teloki tesayur aser yangi azünger/inyakertem anema inyakba mapaji aitsür. Iba dak sentakba nung university kümzüka ayutsü asoshi bangdaki tim mapa inyaktsüla aser onok taginübaji ibaji dang lir”, ta paisa ashi.
Tanü Nagaland University, Vice Chancellor Prof. B.K Konwar-i longkak aitba tesemi arua NUTA (L), CEC NUTA aser PGSU (L) den ajurutepa jembidang, iba dak sentakba nung “University bangdaki tim maparen ajak inyakdaki aser yakta ibai telatetba tajung kati arutsü imlar, anungji, longkak aitba ya anendaktsüner”, ta mepishia metetdaktsü.
Aji saka, longkak aitertemi Vice Chancellor-i ashiba o nungji tzüra matemi “pai iba amai dang yimjak nung o tajung dang jembir saka mapa agi mesayur, joko anogo 13 nü arur saka tang tashi tebangmung kecha mali”, ta NUTA (L) aser CEC NUTA lennirtemi ashi.
“Bangdaki iba dak sentakba keno ya tim teinyaktsü pur “competent authority” dangi abentsüla aser ibai tekaratiba nung ajaki akhümtsübutsüsa tajungtiba nung tembangner, aser iba atema bangdak nungi telangzüba tajung aginer”, ta NUTA (L) lenirtemisa parnok taginüba metetdaktsü.
University nung mapang shia iba amai timtem ajurua arur, saka university bangdaki süoki ia magir. Anungji, “university anema mapa tamajung inyakba ngua iba amai dang yutsüra asenok tarutsü koda alitsü?”, ta CEC NUTA, tir Prof. Sangyu Yadeni ashi.
“Tarutsü nung iba amai matalokdaktsü asoshi bangdaki tapet maparen inyaktsüla”, ta ASHI. “Tim aser ochi nungbo noktaka asen university ya kümzüka ayutsüla”, ta paisa ayongzüka shisem.
Iba osangbeneri NUTA (L) lenirtem dang, “bangdak nungi telangzüba tajung ka mengutetra kechi inyaktsü?, ta metetnüa asüngdangdang, “tanü nikongdang onok lokti senden ka lir, iba senden nungji teloki kechi lemtetdir iba nungji aotsü”, ta langzü.
Iba dak sentakba maparen nung University bangdaki telangzüba tajung magütsüba ajanga NUTA (L)-i Nagaland University Chief Rector shiba Nagaland Governor lir, pa tiyongzüi aita yaritsü asoshi temepishiba shidi ka yokogo, ta NUTA (L) lenirtemisa metetdaktsü.
Tanü ya NUTA (L), CEC NUTA aser PGSU den Medziphema aser Meriema campus CEC NUTA natia nungitba osang ajanga angazüker.