N Zealand Ato Kilonser, John Key-i Fiji semdanger

Suva, June 09 (Agencies): New Zealand Ato Kilonser, John Key-i Fiji semdanga, Fiji kübok tentetba Nausori jila tanü, Brehostibar nü tonga ogo.

Key-i Nausori Airport nung anenzükba sülen Fiji Ato Kilonser, Vorqe Bainimarama-i pa agizük aser idakji mitkartemi tetushi agütsüba sentong ka agiba sülen lenir anati Suva yimtiba bushia ao.

Tenati Suva nung tentetba Grand Pacific Hotel nung senden ka amenba osanga jangjaogo.

Bainimaram-i 2006 küm tashiyim agi yimsüsütsü tashi benokba sülen Key ya par linük semdanger mezüngbuba N Zealand Ato Kilonser akümer lir.

Key-i tan Bainimarama den ajurutepdang taoba N Zealand Ato Kilonser, Helen Clark-i United Nations (UN) Secretary General tasenba akümtsü asoshi inyakba maparen nung pusema nungitsü asoshi Bainimarama ajungshitsü sentong renema lir.

Bainimaram-i Fiji yimsüsütsü tashi tashiyim agi benokba sülen Clark-i Fiji anema tenokdangba sentong benoka laisü.

Fiji’er UN Ambassador, Peter Thomson-i UN General Assembly Tir tasenba akümtsü asoshi candidate ka ama tenüng benoka lir aser N Zealand-ia Thomson pusema nungitsü nangzüka lir.

“Bainimaram-i tashiyim agi yimsüsütsü tashi benokba sülen 2014 küm election agiba mapang tashi, küm 8 tashi par linük anema tenokdangba sentong benoktsü asoshi Clark-i telemtetba tajung agia liasü,” ta Key-ia metetdaktsü.

Aji oda, N Zealand aser Fiji na tsüngda tesendaktep tanaben junga yanglushitsü nükjidong nung Key-i tan Fiji semdanger lir.

Ita ishika tejaklen Fiji nung Cyclone Wintson ataloka, nisunga 40 tashi asüdang N Zealand-i par ketdangser jenti yoka Fiji den yaritepba osanga jangjaogo.

Ano külen, Bainimaram-i yimsüsütsü tashiyim agi agiba sülen Fiji Pacific Islands Forum (PIF) nung medendaktsüi merenshiba den sentakba mangatettepbarena Key-i tan Fiji semdangdang bentettsü sentong lir.

Fiji PIF nung 2014 küm tanaben aniok saka kasa tentet nungi N Zealand o Australia na agienba sülen ang Fiji-i PIF nung züngsemtsü ta shia, Bainimaram-i PIF senden nung shilem magi aruogo.

Nütsüng yongsük nisung 900,000 shi alidak, Fiji ya Hawaii aser N Zealand na tsüngda, South Pacific Ocean nung tentetba asetkong linük ka lir.