N Zealand-i England den Day-Night Test asayatsü renemer

Wellington, May 27 (Agencies): 2018 küm nungi tenzüka England den küm 2 tashi day-night Test asayatsü renemba osang ka New Zealand Cricket (NZC)-i tanü, Hokolbar nü sangoktsüogo.
“Tan sentong renemba ama, telok anapronglai agizükra, ozü teloki England den Auckland kübok Eden Park nung day-night Test asaya temerenso sentsü aketba ball amshia, 2018 küm asayatsü,” ta NZC nung Chief Executive, David White-i osang jangjashitsü.
Par telok ana tsüngda day-night asayaji koba ita asayatsü iba osangbo White-i memetetdaktsü saka England-i N Zealand semdangtsü asoshi 2018 küm February ita nungi April ita tashi International Cricket Council (ICC)-i lemzükja lir.
N Zealand teloki Australia dena day-night Test asaya Adelaide yimti nung yaküm, 2015 küm mezüngsüa asayaba osang jangjaogo.
“Tarutsü mapang nung cricket asayartemi day-night asayatem kanga sapua asayatsü,” ta shia, taoba England captain, Andrew Strauss-ia England & Wales Cricket Board mendenbuba, Colin Graves pusema, day-night Test asayatsüren nungitsü renemba olen ka tan May ita tetenzüklen metetdaktsüogo.