Na anitetba bilemtetang. T. Ken 80

Ni Kibuba nenok Tsüngrem lir shibai nenok Ejip nungi anitet.
Kin kati tarulen memetetra, ajak samar. Ibayongji Tsüngremi Israel nunger nem ozüng tulu agütsü: Ejip bilemtetang! Idangji dang Kibuba shibai nenok Ejip nungi anir adok Pa bilemtettsü, aser nenok Pa nübur aser Pa nenok Tsüngrem alitsü.
Asenok kin ka asütsü arok adokdakji Khrista lir, asenok anitetsang, asenok kümzüksang Asenoki mebilemtet tashi asenok alar liasü. Asenoki asen nüchiso, asenok meimchir terenlok aser lokti junga alibaji teti alitsü ama agir, asenoki ajakji yimya ama agir, saka lia aodang asenok kati ka den alentepa Tsüngrem den lungjema aliba talentep samadaktsür. Asenoki Ejip amadok, aser asenok kin ka akümtsü mekümtetter.
Ibai Tsüngremi Israel nunger asoshi Yakob nem agütsüba ozüng, aser Ejip nungi adoker Yosef nem bendanga nüngloktsüba ozüng lir. Nai ajanga aruba bilemtettang, na arudak bilemtettang, na anitetba bilemtettang, Bethlehem aser Yirusalem aser Kalvary Tenem bilemtettang. Ne taküm otsü bilemtettang, ne talenba aser temenen bilemtettang. Ne alar tia aser temenen tepuokdak nungi na kümzükba bilemtettang. Ibaji asenok arok tera, asenok kija otsü, asenok telungjem tera. Tebilemtetba jagi lungjemdaktsür,  amatokba jagi piladaktsür aser kati ka anemer. Tebilemtetba makabaji nübu ka masü. Otsü makabaji kin ka masü.
Kü nem tebilemtettsü taochi agüjang, Kibuba. Ni bilemtetdakjang. Kü nükdang kü tashi mait aser Ne tekümzükba ngudakjang. Nai kü talenba salatsü, Nai kü zübu anebtsü, Nai kü nela ajungket. Nai kü nem taküm tasen agütsü, aser iba taküm tasen nung kü ayak ngudaktsür. Nia Ijip nung adok, aser kü kija masü tepela telok rongnung dener adok.
Chichiba nübu ka akümtsü asoshi ni Ijip bilemtetdakjang, Kibuba. Amen.