Na aser ner kibong takum Christmas-ji kechi koma ka amongtsü renemer ?

~  L. Kika Pongener.

Asenok ajaki kum shia yongya-a ataba Christmas mungpo tonga arur, tantsür-tambur joko leper nung tetsüng kulenbo ajemoker alirtemi-ang sunga Christmas kanga yongyar, tila tanurtemi-ang teyongyaba, tain-tanur ajungai pei pei taginuba lenmang balala nung yongyatepa atar. Ajioda, iba ocet ajanga sarasadema tazüngertem den lemsatepnubaji, “Na aser ner kibong-ia takum 2018 kum Christmas benjong-ji kechi koma ka amongtsü renemer” ? Na aser ner kibong-ia takum 2018 kum Christmas benjong-ji koba ama tangatetba ka nung amongtsü yongya atar ?
Yisu asoba aonung ayaterm nung Bethlehem yimti tezülen sannukertem moapu nung san nuka liasü. Aser Kibuba kotak tenyar ka parnok dangi jungkai adok, aser Kibuba sentsüwangshi parnok meketa yalok. Aser parnok tetsübu agi asüng. Aser tenyar jagi parnok dang ashi, ” Tetsübu kechiaser ajiang, ni nenok dangi nisung ajak asoshi tepela tulu osang tajung bener arutsür. Kechiaser tanu nenok nem Dawid yimti nung kumtetdakba ka soja lir. Paji Kibuba Khrista lir. Aser nenok dang temaitsüji ya alitsü, nenoki tanur ka kinu-su agi meir tsük mejakdak su nung mejanga angutsü. Aser aoksa-a tenyar denji kotaker telok nungi jenti adoka Tsüngrem tenung sanga ashi, “Tematiba nung Tsüngrem dang sentsüwangshi, aser alima nung pa temulung achiba nisung rongnung tesunep” (Luke-2:8-14). Aser kodang parnoki iba osangji angashi, parnoki ilunga Bethlehem yimti ao, aser Yisu soa alidak nashi ki-ji bushia orr kinu tanur-ji aputaka kulem. Tanabuba nung anutoklen aliba Tashitemetetertemi, Yisu asoba aonung kodanga matokdangba ‘Nungja Petinu’ ka adoka ngur, alima nung tesungmangtsü tatalokbatem indang bushidanga züngdanga aodang ainkartemi shinba o-tem bilemteta, Bethlehem yimti bushia parnok akaba tajungtiba nungi senti-rongsen senpet jenti renema bener kinu Yisu kulemtsü bushia aru (Mathi-2:1-11). Tasembuba nung Herod Chuba-i kodang Bethlehem yimti nung Yisu Khrista asoba osang angashi, pai kum ana nungi tekupok tebur chanu ajak tepsettsü ozüng agütsü, aser Yihuda lima ajunga tajepba aser mangyim agi asüng (Mathi-2:16-18). Pezübuba nung Yirusalem nung nisung ka tenung agi Simoen Temeshi aser yimsu nung keta asenba nisung ka liasü. Tanela Temeshi ajanga pai Kibuba meyong Khrista mangu tashi, pai tasüba mangutsüla ta… Pa tang Tanela ajanga jungkai adoka sayur liasü. Ajioda, pa tang sayuba ama pai iba anogo asoshi Tanela nung kanga yongyaseta ata-a liasü. Aser kodang Yisu Khrista meshitettsü asoshi Yosef aser Mary nati Yirusalem Tenla kidangi anir aru, Simoen-i pei ket nung Yisu ajungzük aser pai Tsüngrem tenung sanga moaja ashi, ‘Tang Kibuba ne o amato nai ne tenzüker tesunep nung piladakjang, kechiaser ku tenuki ne tekumtet nguogo; Koba nai nuburtem ajak asoshi renemogo; oda bendangertem dangi tesangwa ka jungkai adokba aser ne nubur Israel dangi sentsüwangshi asoshi’ (Luke-2:25-32).
Temeim amangbapur tajungtem, tang asenoki itum telok pezü-i Yisu asoba Christmas Benjong koda agizük, laishiba nung aliba nungi kuli tejangja nguogo. Asenoki sannukertem tia-ji khen jungjunga reprangdanga shisadangra, parnok ya sensakertem, tepetzük tia nung aliba-purtem lir. Aji oda, parnok akaba tajungtiba ajunga agi tashi anga-a, parnok mapang tenla agütsüa ilunga oa aputaka kulemtsüba… aji tang liasü, aser parnoki parnok akaba tajungtiba Yisu nem agütsü. Na aser ni sensaker mokokminer ka tang asütsü akok, saka asen akaba tajungtiba, asen mapang, asen sempet, asen Tanela tamang Yisu nem bendanga agütsüdi. Alima talang nungi tashitemeteter-temi parnok akaba tajungtiba senti rongsen, senpet jenti bener arua kinu Yisu kulem. Na tulur-takar ka asütsü akok, naia Christmas tenung nung na ama takar-tulurtem den ner akaba tajungtiba senpet-lep lemsateptsü asoshi renemer asü ? Ne nem nai agütsüba senpet ‘Shijep & Cake’ dang nungi tuluba meyipa agütsütsü teimla nung lemsateptsü renemer asü ? Mesura maka-maiter, timtemer, meshi-mejungertem, ne nem kodanga kecha meyipa magütsütettsü-pur den lemsateptsü renemer ? Yimten yimsusur, linuk tenzüker aser lokti lennirtem, Herod Chuba-i pa yimli nung, tebur chanu kum asem tekupok ajunga taochi makai tepsettsü ozüng agütsüba, aser Yihuda lima ajunga mangyim aser tajepba agi sungdaktsüba ama…Tashiyim, ambangyim, merumeru, chiyungdi, azütokshitsü jangraba shisatsü, kati ka arishitepba, nukmeremtepba aser tsükchitepba, yamala shisatsü dener Christmas amongtsü yongyar asü ? Yimsu nung keta asenba aser Tanela Temeshi agi asüngba nisung ka, Simeon-i Yisu Khrista miimchir alangzüksang Yimjung Chuba chir-ji, pa tenuki mangu tashi pai tasüba mangutsüla ta Tanela nung tsüraseta yongyaseta ataba ama, pei takum aser kibong nung kinu Yisu sodaktsür asüngteta, meshiteta amongtsü yongya-a atar asü ? Temeim tamanger tajungtem, na aser ner kibong-ia Christmas-ji koma ka amongtsü yongya-a atar ? Asenoki asen lima nung yimjung, tesunep aginur aser nujiso aginur. Surabang, asenok adianu o adianu tsüngda, kiyonger o kiyonger tsüngda, yimer o yimer na tsüngda, nubur o nubur tsüngda, kin o kin tsüngda nung yimjung lir mali ? Asenok o asenok tsüngda nung kecha tetsübu mekai temulong lemtet-lemteta alitsüsa asen lima nung nujiso kar maka ? Ibaji-ang shidakba yimjung, tesunep aser nujiso-ji asütsü. Idangji-ang asenok takum aser kibong nung chichiba Christmas benjongji mungtetsü.
(Maneni taruba adok nung…)