Na (Modi) Gujarat CM ka inyaka ali nunga nai-a koma süla (?): Chandy

Thiruvananthapuram, December 17 (Agencies): Bodhbar nü Kerala chief minister Oommen Chandy-i Ato kiolonser Narendra Modi dangi shidi ka züluogo, aser iba shidi ajanga pai Modi dang, Mongolbar nü Kollam nung taoba mapang Congress nungi chief minister R Sankar indang kürakyanglu sayaba sentong lenitsü atema pa dang asüngdangba thinentsüba atema mepelaba lemsatepogo.

“BJP dak alaka yimtenren party ajak aser media-i, chief minister jaokba sülen ibaji thinentsübaji Kerala nüburtem mezüngmeshiba lir ta shiogo. Teti agia ni mangatettep nungi jenbua alitsü meranger, aser mangatettep paitoktsü atema PMO (Prime Ministers’ Office)-i tiyongtsüi maitbaji süngmanger. Ni iba ya metetnür, na (Modi) Gujarat chief minister inyaka aliba mapang iba ama atalok nunga nai-a koma süla (?),” ta Chandy-i Modi dang asüngdanga lir.

Kerala CM-isa Union home minister Rajnath Singh aser par külem cabinet Rajiv Pratap Rudy na aija, “Kü dang nungi mesüra kü office nungi osang tejangja magitepi Parliament nung telangzüba tai agütsüogo,” ta ashi.

Paisa, “Ni madenbaji mapang mesütepba ajanga, ta Rudy-i Parliament nung metetdaktsübaji tai,” ta ashi.

Chandy-i, “sentong tayonger SNDP Yogam general secretary, Vellappally Natesan-i anaeben tashi iba sentong nung madentsü kü dang mepishiogo, ajisüaka tamalenbo Vellappaly-i iba sentong nung adentsü atema ni jaoka liasü,” ta ashi.