NA nung ‘water fountain’ 2 yanglu; kobi melii shidi mamshitsü

Kohima, November 14 (TYO) : Assembly Secretariat kübok house anaprong den ano tanga tongtipang ludentem aliba reju- Nagaland Legislative Assembly (NLA) nung tanü ‘water fountain’ ana lapoktsü.
Mongulbarnü NLA Speaker Chotisuh Sazo-i ‘water fountain’ anaji lapoktsü. Water fountain ka Assembly Hall (Column with Dome Fountain) jakdang aser ka Legislators Home (Geyser Fountain) jakdang lir.
NLA nung yanglua aliba fountain ana nung second 30 shia tzü sentsü melener.
“Onoki Assembly Secretariat ya State nung tobur tajung aser mapa teinyaktsünü tesem ka kümdaktsünür. Anogoshia office nung gondha aika mapa inyaker, anungji office temeket tobur junga ayuba aser merükmejua ayuba ajanga teinyakertem ajungmesor” ta NLA Speaker, Chotisuh Sazo-i ashi.
“Iba nung ajemdaker Assembly Secretariat ya Green & Plastic Free Zone ta jaloktsüogo, anungji public aser temeket nung alirtemi iba tesem merükmejua ayuba nung yariteptsü mepishir,” ta Sazo-isa ashi.
“Project E-Vidhan kübok Nagaland Assembly nung paper mamshitsü atema mapa inyakdar. Onoki taintem den temang aser tekolok agi tangar memenepertem Assembly hall-i aotsü atema lenmang balaka yanglutsütsü bilemer. Anosa, MLA tem atema Library Hall, Gym, Indoor Stadium aser recreation facilities yanglutsütsü” ta NLA Speaker-isa metetdaktsü.
Tanü nikongtsütsü ‘water fountain’ lapokba sentong nung mendenji Commissioner & Secretary, N Benjamin Newmai liasü aser pai ashiba agi, iba sentong ya Speaker Sazo-i shisateta inyakba lir.
NLA Speaker Sazo den Deputy Speaker Imtikumzuk-i yaritepa Secretariat nung mapa aika inyakogo aser tanü-asüng amshiba osettsüset aika enoksemogo, ta Newmai-isa ashi.
E-Vidhan kübok NLA-i Union Minister for Information Technology den tebilemba lemsatepogo, ta Commissioner & Secretary-isa shisem.
Iba sentong nung State Chaplain Rev. Kuzierang Thou ‘water fountain’ tem meshiteta sarasadem.