Na ya tesangwa !

Laishibai ashir, asenok ajak ya tesangwa lir. Aji oda, tanü nü dang kari nü tenüng watsü mesüra wabong Tesangwa lir ta ashika asünunga naia koma bilemtsü. Ni jashia dang alir nung kodaser kü tenüng tesangwa asütsü ta nai bilemtsüa akok. Kü o aser mapa agi shinga mepeladaktsütetter nung kodaser kü tenüng tesangwa asütsü ta nai rataa bilemtsüa akok. Ajisüaka, Mathi 5 : 1416 nung ashir, “Nü dak aliba tesangwaji nisungtemi angutsüsa yalokjang, idangji parnoki nai tajung inyakbaji angutsü aser kotak nung aliba tebu sentsüwangshidaktsütsü.” Tetezü asenok nisung shia dak tesangwa lir aser asen dak aliba tesangwa jagi amang ajak sangwadakja ayatsüla. Tesangwai inyaktsüba mapaji amang sangwadaktsütsü asoshi lir. Aji oda, Tsüngremi nü taküm nung iba sangwa jagi sünga lidaktsüner. Iba tesangwa jagi nü dak Tsüngrem tashi alibaji tangar tsüngdang kuli südaktsüner. Iba jagi asen meketa aliba adianutem shirnok mulungjang nung tamang aser shisabolu agi sünga lir, parnok mulungjangji tesangwa agi melentsütsü. Ajisüaka, asenoki asen aliba lima ya temenen agi sünger tammangba- tammangba akümba angur. Iba ama mapang nung asenoki tammang aitsüba kija agibo tesangwa mangutsü. Alima manga akümbaji parnoka parnok shilem inyaker, anungji asenoka asenoki  inyaktsüba tongtibang mapabaji  asenok dak aliba tesangwa tashiji tammang tashi dang nung jagi tuluba asütsüla. Kodang asen meketa tammang agi süngadokdir, tebilemtsüji amangji masü saka mesangwadaktsütetbaji asütsü. Yisui asenok ajak ya alima sangwadaktsürtem südaktsüner. Alima nung Tsüngrem temeim mangashidangba purtem million aika lir, item dangji asenok dak aliba tesangwaji bener oa Tsüngrem temeim metetdaktsütsüla. Kodang, Yisu alimai aru, alima nung tammang jena oa adok. Alima tammangi pa tesangwaji metizüktet. Pa aolen ajaklen Tsüngrem temeimi alima meimchirtem kümzükba osang tajung sangdong, meimchirtem temulung meyip, shirangertem aneptsü, temenen purtem nem taidok agütsü aser anemsüba mapatem jakdaka arütsü. Alima temenen tammang tia nung aliba mapang kodang Tsüngremi iba limaji sangwadaktsütsü asoshi Pa chir Yisu Khrista alimai yok, iba jagi alima sangwadaktsü. Ibayongji, asenok ano tanaben Tsüngrem chir aküm, anungji joko asenok tammang chirtem masü tesangwa chirtem lir ta Laishibaisa ashir. Tesangwa chirtem tetezü asenok dak tesangwa lir aser iba tesangwa jagi amang tia nung aliba taküm aser kibong sangwadakja inyaktsüla. Asenok dak aliba tesangwaji tangari angutsüsa asenok taküm aser kibong alitsü tim. Nü dak aliba tesangwaji tsükloker oa tangar tsüngdang sayuang ta Laishibai mashir, saka tangar nem ngudakjang ta ashir. Tetezü asenoki mesayutsü saka tangari asen dak tajung alibaji reprangtettsü. Aji oda, asenok taküm aser kibong nung tesangwa alibaji asen meketa alirtemia angutsüsa asenok Tsüngrem den teti alitsübaji kanga tongtibang asütsü. Ken agia ashir, talang nung alirtemia nü dak aliba tesangwaji angutsüsa, na alidak sangwajang. Asenok ya tesangwa, anungji taküm piyong asenok asoshi amang ya tsükchir asütsü.