Nabam Tuki melena Pema Khandu-i Arunachal CM inyaktsü

Itanagar, July 16 (Agencies) : Congress lennir Pema Khandu-i Arunachal Pradesh nung Chief Minister inyaktsü atema taruba hopta tenangzükba agitsü.
Tanü Chief Minister Nabam Tuki-i pa mapa nungi anenba sülen arishi küm 37 tain Khandu Congress legislature party leader asütsü shima liasü.
Khandu ya Hindu College, Delhi nung graduate asü aser yaküm Nabam Tuki lenisüba anema apusor Congress MLA 21 rongnung pa-a dena liasü.
2011 küm tebu, taoba Arunachal Pradesh chief minister Dorjee Khandu helicopter lendong nung asüba sülen pa Tuki’er ministry nung aniok. Tatsüka lir külen Khandu nem Tourism & Water Resource Development department lemzüktsü saka 2014 küm pai Tuki’er cabinet toktsü.
Honibarnü Arunachal CM Tuki-i Congress Legislature Party (CLP) leader nungi anen aser iba mapa atema Khandu shim.
Taoba Bodbarnü Supreme Court-i Tuki tanaben Arunachal Pradesh nung Chief Minister inyaktsü atema obendang agütsü aser tanü Tuki-i CLP lennir inyaktsü atema Khandu tenüng benokdang MLA 44 pronglai ibaji mulunga agizük.
MLA 44 rongnung Congress nungi 15 aser taküm People’s Party of Arunachal (PPA) nung adener Congress nung temulung masüba MLA 29 dena lir.
“Iba ya Arunachal Pradesh nung Congress atema takok tuluka lir. Tawa adokba mangatettep ya BJP ajanga adokdaktsüba lir. Ajisüaka, parnok mapa tamajungtem tamakok nguogo, kechiyong Congress-i mepetmesü koktetogo. Iba ya BJP atema tangazüktsü tulu ka asütsü ta ni imlar” ta tanü Raj Bhavan nungi aludang Nabam Tuki-i ashi.
PPA nungi Congress dangi MLA 30 aruba ajanga assembly nung Congress züngsem 45 kümogo aser parnok rongnung Speaker, Nabam Rebia dena lir. Iba den Independent MLA anatia Congress pusema nungiter.