Nabha Jail nungi nisung pongu ajen

Patiala, November 27 (Agencies): Deobarnü Punjab, Patiala yimti nung tebur telok kati police süoshi semer security akanga aliba Nabha Jail amakba sülen Khalistan Liberation Front tongti, Harminder Mintoo densema nisung pongu anir jenogo; iba tatalokba sülen Punjab sorkari DG (Jails) anenja atar aser Jail tongti ketdangser anabo mapa nungi anentsüogo.
State nung opposition party, Congress-i, iba tatalokba ajanga state nung tzüzüng ozüng maliba sayur aser assembly election agitsü mapang ana nung lia kiralongra asentenshiba sayur, ta state sorkar aitsü.
Centre-ia state sorkar dang iba tatalokba indang osang tejangja agüjang, ta tuyuogo.
Police-i ashiba agi, lanur telok ka police süoshi semer jail-i aita injang sashia kahloktsü, iba sülen parnoki kiralongrar tetsüti ka densema nisung pongu anir ajen.
Jail nungi ajenertemji Vicky Gaundar, Gurpreet Sekhon, Nita Deol, Vikramjeet aser Mintoo nunger lir, ta parnokisa ashi.
2014 küm Punjab Police-i Mintoo ya Delhi nung aliba IGI Airport nung apu. 2008 küm Dera Sacha Sauda tongti¸ Gurmeet Ram Rahim Singh amakba aser 2010 küm Halwara Air Force Station nung tapoktsütem anguba ken o densema ken o 10 nung pa anema tai tonglokja lir.
Iba tatalokba sülen Punjab aser Haryana na nung aliba railway stations, airports, inter-state bus terminus aser tongtibang tesemtem nung police-i parnok mita bushidar.
Punjab Chief Minister, Prakash Singh Badal-i State Chief Secretary Sarvesh Kaushal densema tongtibang ketdangsertem rongdak senden ka ayonga liasü.
Deputy CM, Sukhbir Badal-i, “Jail DG anenja atar aser Jail superintendent o Deputy Jail Superintendent na mapa nungi anentsüogo,” ta metetdaktsü.
Deputy CM-isa, ADGP rank ketdangser ka kübok bushisüngdangba telok ka tentetogo, aser parnoki mapa nung tashimaitba densema kuli balala bushia anogo asem tsüngda report agütsütsü, ta metetdaktsü.
Ano Home Secretary danga iba tatalokba indang report agüjang ta tuyuogo.
“Iba tatalokba nung aibelenertem nem temerenshi tulu agütsütsü,” ta paisa shisem.