Nacional puri fan tenüng nung Chapecoense dang tatok meshi

Tsüklai 3, 2018 (Agencies): Brazil football club Chapecoense shirnok 2016 küm tayimtsü tsükokba nung squade ajunga tera agi mesama parnoki Nacional pur Libertadores Cup nungi agintsü asoshi ketdangsertem dang khangogo. Rogonü team ana tsüngda asayaba mapang nung Nacional club fan temi tayimtsütsükokba dak sendakba nung atalaa temaitsü balala sayuba sülen Chapecoense puri iba takhangba ya agütsü.
South American football’s governing body CONMEBOL-i iba ken o dak sendakbaba nung bushisüngdang tenzükogo.
CONMEBOL-i Nacional dang team ana tsüngda tanabuba leg asayaba sülen anogo ka lir Tsüklai 8 tashi nungbo parnok indang kuli agütsütsü asoshi tetuyuba agütsüogo. Telok ana tsüngda mezüngbuba leg asaya nung Nacional puri 1-0 agi kokogo.
Iba dak sendakba nung Chapecoense puri obendang ya Tsüklai 7 tashi nungbo agütsütsü asoshi mepishiogo, mesera obendang magütsü tashi masayai atatsü asoshi asüngdangogo.
“Chapecoense puri Nacional, Libertadores nung agintsü asoshi akhanger,” ta club sangdong ka ajanga metetdaktsü.
Uruguay club yagi fan tem tenüng nung yimjak nung shidi ka ajanga tatokmeshiogo aser iba tatalokba sülen anogo ka lir parnoki iba ken o nung sendaka aliba nisung ka jangjatetogo aser pa club nung züngoksemer aliba aginogo.
Parnoki iba nisungba tenüng ya mesangdong saka pa membership number dang tetshia jembi.
Chapecoense pur Copa Sudamericana Colombian side Atletico Nacional den final asayatsüba atema Yimpoksüi (November) 2016 nung aodang lendang Medellin anasa tayimtsü tsükoka parnok 77 mena aliba nungi parnok asem dang kümzük.
Southern Brazil club ya yaküm asendenshir asayaba nung parnoki Libertadores qualifying round tashi tongteta liasü.