NADA-i Narsingh Yadav metentsüogo; Olympics nung shilem agitsü

New Delhi, August 01 (Agencies): National Anti-Doping Association (NADA)-i ozüng alema tali tashi itshitsü mozü mora achiba ken o nung aibelena maliba o bendang agütsüba sülen India nunger melangteper, Narsing Yadav-i 2016 Rio Olympics nung India tenüng nung toktepa shilem agitsü temeten tanü, Hombar nü nguogo.
“Ozüng alema mozü mora achiba ken o nung Yadav-i aibelenba kuli mali. Pa ya pa anemertemi pa jenjang mejungi kümdaktsütsü merangba melangteper ka lir,” ta NADA nung Chief Executive Officer, Naveen Agarwal-i tanü metetdaktsü.
“Taküm June ita 2 nü tashi nung Yadav-i ozüng alema mozü mora achiba osang meputet anungji, tan mezüngsüa mozü mora achiba bushitetba ya Yadav-i metetsümonga mozü mora achiba masü,” ta shia, NADA’er anti-doping ozüng kübok Arrla 10.4 ajanga Yadav metentsüba olen ka pai shisem.
Temang touzük seret 74 taret freestyle melangteper, arishi küm 26 tain Yadav-i ozüng alema mozü mora achiba putetba sülen pa anema ken o benoka liasü saka pai tan temeten ngua Rio Olympics nung shilem agitsü jenjang angur lir.
Pa melena Olympics nung shilem agitsü asoshi India nunger melangteper tanga ka, Parveen Rana shima liasü saka tan NADA-i metentsüba sülen Yadav tenünga India tenüng nung Olympics nung shilem agir asayar tarensen nung densemtsüsa tan jenjang tajung nguogo.
“Ni ozü India linük asoshi Olympics medal agizüktsü yongyatsü tenzükogo,” ta Yadav-ia pa metentsüba osang angazükba sülen metetdakja liasü.