Nadal Grand Slam asaya 200 buba akoker asayar akümer

Paris, May 26 (Agencies): Spain nunger tennis asayar mongin, Rafael Nadal-i tanü, Brehostibar nü takok ngua, tang tasayadak French Open asayamong tebur singles shilem 3 buba round asayatsü jenjang nguogo.

Nadal-i tanü takok anguba sülen pa alima ajunga nung Grand Slam asayamong asaya 200 buba akoker asayar 8 buba akümer lir.

Taoba mapang French Open takok marok 9 ben tashi agizüka alisang, Nadal-i tanü minute 39 nung points 6-3, 6-0, 6-3 ngua, Argentina nunger Facundo Bagnis 2 buba asaya nung tsükdaktsü.

Switzerland nunger Roger Federer-i asaya 302 tashi koka Grand Slam asaya timba akoker asayar otsü yanglua lir saka pa yirua aliba yong pai tan asayamong nung shilem magiteti lir.

Ano külen, India nunger Leander Paes aser Switzerland tsür, Martina Hingis natia points 6-4 6-4 agi Germany tsür, Anna-Lena Groenefeld aser Colombia nunger Robert Farah na madak takok ngua mixed doubles quarterfinal-i aiba osang jangjaogo.

Tenati Yaroslava Shvedova o Florin Mergea na aser Lucie Hradecka o Marcin Matkowski na rong nung takok angur den quarterfinal nung ajuruteptsü.