Nadal-i Davis Cup nung Zverev akok

Valencia, Rongchii 09 (Agencies): Spain nunger Davis Cup nung teimla mesamadaktsüi Rafael Nadal-i quarter-final nung Germany nunger Alexander Zverev madak Amungnü asayaba nung akok.
Valencia nung tang tasayadak aliba Davis Cup tennis asayamung nung Nadal-i 6-1, 6-4, 6-4 agi Zverev madak takok anguba ajanga linük ana tsüngta 2-2 tie nung lir aser Spain nungi David Ferrer aser Germany nungi Philipp Kohlschreiber na tsüngta asayaba nung semi-final atongtsü atema telemtetba agitsü.
Set shia break ana-na anguba ajanga Nadal-i mela mela Zverev madak takok angu aser ibai Spain nunger arishi küm 31 tain asoshi yiruba sülen asayamung tanabuba alitsü.
“Mezüngbuba set tajung liasü. Mapang kakabo asaya kanga tasak asüba ajanga ni mazüokteti aküm. Ni mapang talangka asaya nung shilem magie aru aser mezüngbuba set nung ama asayatsü kanga tasak liasü,” ta Nadal-i asaya temer ashi.
“Saka ajak atema iba match ya kanga tongtibang liasü aser ni kanga pelar,” ta pai ashi.
Aenjeti (January) nung Australian Open asayaba mapang Nadal yiruba ajanga asayamung tom nungi anentsüsa aküm, saka 16ben Grand Slam takok marok bena alisangi Zverev den asayadang pa indang sempet sayutetogo. Tena tsüngta pezübenbuba asaya lir aser asaya ajunga nung Nadal-i dang koka lir.
Iba asaya ya Nadal asoshi Davis Cup nung asaya 24buba atonga akoker asütsü.
Rogonü asayaba nung pai straight sets nung Kohlschreiber akok aser Zverev-i Ferrer akok. Tarep asaya nung Tim Puetz aser Jan-Lennard Struff nati Feliciano aser Marc Lopez na koka Germany 2-1 agi timba liasü, saka Nadal-i Zverev madak takok anguba ajanga linük ana tsüngta 2-2 kümogo.