Nadal-i taoba France Sports Minister anema okadak ken o benoker

Paris, April 26 (Agencies): Spain nunger tennis asayar mongin, Rafael Nadal-i taoba France sports minister, Roselyne Bachelot anema okadak ken o benokogo.
Ozüngi memalaba mozümora achiba tetendangbaren nungi jenbotsü nükjidong nung Nadal-i alima dang yirua sayuba olen ka Roselyne-i sangoktsüba sülen iba ken o nung ajemdaker, Nadal-i la anema okadak ken o benok.
“Tan okadak ken o benokba ajanga ni temeten angutsü aser asayar ka ama tenüngmenok ajurubaren agientsü alizüng yua lir. Ano, lenir kati kuli tejangja mongui asayar ka nem yimjak nung maksü bener arutsübaren nokdangtsü nükjidong nung ni okadak ken o benok,” ta Nadal-ia osang jangjashitsü.
Taoba mapang Grand Slam tako marok 5 ben tashi agizükla, Russia tsür, Maria Sharapova-i ozüng alema mozümora achiba nangzükba den sentakba osang kar French television nung agidang, taoba mapang, 2007-2010 tashi France sports minister menden abenla, Roselyne-i Nadal den sentakba olenji taoba March ita lemsatepa liasü.
Ajisüaka, taoba mapang Grand Slam takok marok 14 tashi agizüksang, arishi küm 29 tain Nadal-i tanü tashi nung ozüng alema mozümora tetendangbaren nung ken danga aibelenba osang bushiteta mali.