Nadal, Sharapova, Wozniacki nungeri mezüng asaya kokogo

Melbourne, Aenjeti/January 14 (Agencies): Australian Open mezüngbuba round nung Rafael Nadal aser külem asayar tejan Maria Sharapova-i takok tajung ngua osang tejangja ka agütsüogo.
Grand Slam 17ben tashi koker alisang Nadal-i mezüngbuba round asaya nung Australia nunger James Duckworth 6-4, 6-3, 7-5 agi koka liasü.
“Ita aika masayai arur, point shia atema kanga toktepa asayar ka den asayatsü ya temela masü,” ta Nada-i ashi.
Tebur kija asaya nungsa fifth seed Kevin Anderson-i 6-3, 5-7, 6-2, 6-1 agi taoba küm Wimbledon finalist Adrian Mannarino madak takok nguogo.
Tetsür kija asaya nung Sharapova shibai, 2017 küm tenokdangba agütsür aliba mozü amshiba atema asaya nungi nokdanga liasü, la iba tajangshiba sülen nungi Grand Slam nung junga masayateti aruogo, saka taküm lai Britain tsür Harriet Dart 6-0, 6-0 agi koka tanga asayartem nem osang tejangja ka agütsüogo.
La tang agi Australian Open 15ben buba asayar aser la iba asayamung final asem tashi nung asayaogo. Lai ashiba agi, tetsüng yirur aliba nungi tanaben meyipa arur asayatsü ya temela masü.
“Iba asaya ya kü tetsüng asoshi tetendangba tajung ka liasü,” ta lai ashi.
tetsür kija asaya nungsa seed 5buba nung alila Sloane Stephens-i 6-4, 6-2 agi külem America tsür Taylor Townsend kokogo.
Kasa mapang nung Belarus tsür Aryna Sabalenka-i mezüngbuba asaya koka tanabuba round tongtetogo, ajisüaka Julia Goerges shibai tawa Auckland Classic koka liasü, la America tsür Danielle Collins-i tsükdaktsü.
Maneni kasa asayamung tetsür kija asaya mezüngbuba round nung Caroline Wozniacki 6-3 6-4 agi Belgium tsür Alison Van Uytvanck madak takok ngua tanabuba round tongtetogo.
Wozniacki-i set anaprongla nung Van Uytvanck indang serve khen khen break süa liasü aser unforced error kangabo memenai asayaa, Rod Laver Arena nung mezüngbuba asaya minute 33buba nung akok.
La taruba asaya Sweden tsür Johanna Larsson den asayatsü, shibai Vera Lapko koka liasü.