Naga Accord ajanga Manipur litsü mekongshitsü: Narendra Modi

Congress-i küm 15 nung Meinyaktetba, BJP-i ita 15 nung inyaktsü

Imphal, February 25 (Agencies) : Manipur nunger aikati Naga accord atema tebilemtsü bena ashishitepba mapang ka, Prime Minister Narendra Modi-i Honibarnü ‘2015 agreement’ nung Manipur indang litsü nung kongshitsüsa ojang ka danga enoka mali ta kuli agütsüogo.
Paisa, “Congress sorkari küm 15 nung meinyaktetba mapatem BJP sorkaribo ita 15 nung inyaktsütsü” ta ashi.
Imphal West district nung aliba Lanjing Achiuba nung Honibarnü election nüboyimba sentong ka nung jembidang, Modi-i ashiba agi, “Manipur nung Congress sorkar küm 15 tashi mejanga liasü. August 3, 2015 nü ‘framework agreement’ agi aser tang state sorkari election agitsü aliba nung rangloker iba onük bener arua jembir.”
“Naga Accord nung Manipur nunger dak mesüra litsü dak kongshitsüsa onük ka danga mali. O Ibobi Singh’er sorkari Naga Accord nung ammeter nübortemi mashileni anitsü atema olulu aser tiyazü prokshir” ta Modi-i ashi.
Manipur nung Congress sorkari ashiba agi, NSCN-IM aser Centre tsüngda agitepba ‘framework agreement’ nung Manipur litsü kongshitsüsa onüktem dena lir aser iba jagi parnoki iba tenangzüktep yimjak nung memetetdaktsüi miimbanga ayur, ta ashir.
Manipur nung tang UNC-i rongsenren mokdangba atema jembidang, Modi-i “iba ya state sorkar ajanga lir” ta aitsü. “Manipur nung Bharatiya Janata Party sorkar tentetra, mokdangba kecha malitsü” ta paisa shisem.
“Centre-i mokdangba anendaktsütsü atema teyari agütsüogo, saka Congress sorkari nübortem timtemdaktsür aser iba sorkar ya yimsü asütsü temeten mali” ta Prime Minister-isa shisem.
“Onok indang alizüngji Manipur longjemtsü, nübortem asoshi mapa inyaktsü aser state nung terenlok bener arutsü atema lir. Nenoki parnok (Congress) nem küm 15 agütsüogo, anungji onok nem küm 5 agüjang. Ita 15 tsüngda anüngdaka aliba mapa ajak onoki inyaktsütsü” ta paisa nangzük.
“Küm 15 tashi Manipur raksatsüogo. Iba ya shibai? Congress-i terenlok bener maru, anungji parnoki maneni sorkar abentsü temeten mali” ta Modi-isa ashi.
Atal Bihari Vajpayee-i anir sorkar tentetdang, pai northeast renloktsü atema sentongtem atong, saka Congress-i itemji mapa küma meinyak. BJP-i North East nung alirtem atema bilemtsür aser NE atema ministry balaka tentetaka, tanüngba ministry ajaki NE nung senotsü indangindanga dang agütsür, ta Modi-isa ashi.
Prime Minister-i assembly election nung BJP atema nüboyimtsüi arutsü ta osang sangdongba sülen telungpur troki tentetba- Corcom teloki tanep 6:00 ako nungi Manipur state ajunga mokdangtsü ayongzük.
Iba ajanga tensa mesüngjemteti aküm aser tanü Modi’er sentong nung nisung imlaba ama aika maden. Ajisüaka, lendong-tsüdong kecha mataloki sentong agi.
Tanü Manipur nung shisaliok rejutem ajak shibang, shishilembadak aser tanga facility tem azüngazünga liasü aser garitem mesenzü.
Manipur state assembly elections ya shilem ana lemsar agitsü. Mezüngbubaji March 4 nü aser tanabubaji March 8 nü agitsü sentong lir.