Naga accord atema Congress-i Modi’er sorkar dang asüngdanger

New Delhi, July 9 (TYO): Yaküm Naga accord sign asüba nung Centre-i NSCN(IM) den India’er yimsüsübaren aser litsü atema tenangzüktep agia lir asü ta Honibarnü Congress-i Narendra Modi’er sorkar dang asüngdang.
Modi’er sorkari Naga nunger dang nisan aser passport balaka agütsütsü atema tenangzükba agia ali asü, ta Congress-isa asüngdang.
National Socialist Council of Nagalim (Isak-Muivah) General Secretary, T. Muivah-i The Hindu osangkaket den sensaksemdang Naga nungertemi pei sasa yimten yimsüsüba takhangba magien ta ashiba nung ajemdaker Congress-i Modi’er sorkar anema ola adok.
August 2015 nung Centre nung BJP sorkari NSCN(IM) den framework agreement ka agi.
Naga nungertemi nisan aser passport balaka meshibaji ‘takhangba’ ka masü saka temeten ka lir, kechiyong Naga nunger kodanga India kübok maliasü, ta Muivah-i osangbener den jembidang ashi.
Taruba monsoon session nung Congress-i Parliament nung iba onük benoka jembitsü ta ashi aser parnokisa framework agreement ji yimjak nung metetdaktsütsüla ta takhangba agütsüogo.
“Modi’er sorkari India linük nung yimten yimsüsüba dak kongshia NSCN(IM) den tenangzüktep ka agi asü? Sorkari Naga nunger atema India’er yimten yimsüsüba lemdanga inyaktsü mulunga agizük asü?” ta Congress otongdar, Randeep Singh Surjewala-i ashi.
“NSCN(IM)-i Naga nunger atema nisan aser passport balaka meshibaji takhangba masü saka temeten ka lir ta ashi. Paisa framework ji miimbanga ayutsü, kechiyong tatembang telemtetba ka magi tashi, miimbanga ayutsüsa akümer ta shiogo” ta Surjewala-isa shisem.
“Modi’er sorkari Naga nunger den agreement agiba osang tejangja metetdaktsütsüla. Centre sorkari tanga northeast state tem dang asüngdangya mesüi tenangzüktep agi. Nagaland, Assam, Arunachal Pradesh aser Manipur state tem indang litsü lemshitsü atema Modi’er sorkari item state sorkar den asüngdangteptsü asü masü? ” ta paisa asüngdang.
“Modi’er sorkari Linük Nisan dak alia Naga nunger atema nisan balaka agütsütsü nangzüka lir asü? Modi’er sorkari Indian passports dak alia passport balaka agütsütsü mulunga agizük asü? Modi sorkari miima agiba framework agreement nung kechi onüktemsa dena lir? ” ta Congress otongdarisa ashi.
“Olemtep ajanga Naga yimten tebilemtsü khuret atema telemtetba tajung ka agitsü inyakba mapa nung Indian National Congress-ia pusema nungiter. Ajisüaka iba mapa ya linük temzüng kübok inyaktsüla aser India’er yimten yimsüsüba aser litsü nung mekongshitsüla” ta Surjewala-isa shisem.