Naga Accord yimjak nung memetetdaktsütsü

New Delhi, Tsüklai 2 (TYO): Nagaland assembly election atema Ministry of Home Affairs-i para-military forces company 270 mapa lemzüktsüogo, ta Minister of state for home affairs Kiren Rijiju-i ashi.
Nagaland nung political party aikati election magidang Naga yimten latettsü atema takhangba agütsür aser iba atema Rijiju-i ashiba agi, “civil society-i candidate tem noktanger. Nomination maparen anogo ana tejakdang tenzük saka tang tashi nung shingaia nomination masü lir.”
“NNPG ama civil society teloktemi election nung shilem magitsü rongshir aser iba jagi candidate tem tsübur, saka election indang maparen inyakdar aser tanga civil society telok kari election pusema nungiter, anungji election agitsü imlar” ta Rijiju-isa shisem.
Tensa mejungi akümtsü akok ta arentaka bilemba agi Centre sorkari Army dang tenük yoka reprangtsü tetuyuba agütsüogo. Tang tashi nung tema aser telung nung alirtemi ozüng alema mapa meinyak aser iba atema kanga pelar, saka Centre-i Naga accord yimjak nung memetetdaktsütsü, ta paisa ashi.
2015 küm Centre aser NSCN(IM) tsüngda Framework Agreement agiba ajanga Naga yimten tebilemtsü atema telemtetba ka agitsü südi ta bilem saka küm 3 süiaka framework agreement nung kechi onüktemsa dena lir memeter.
RSS lennir kati Greater Nagalim nung Assam kübok district kar adentsü ta ashiba sülen tawa tu Assam nung mepetmesü adok.
“Onoki iba accord nung sign masü tashi keta aliba onüktem yimjak nung memetetdaktsütsü. Olemtep tagidak nung yimjak nem metetdaktsübaji tim mas. Olemtep timi dang agidar aser tatembang telemtetba ka agidakjang” ta Rijiju-isa ashi.
BJP-i election nung tokteptsü ta ashiba atema Rijiju-isa ashiba agi “BJP-i election nung tokteptsü. Mezüngbo election nung shilem agitsü sangdongba nung BJP dena liasü saka iba sangdong nung sign asütsü atema teshimtet nübo nem tashi magütsü ta BJP state president-i jangjajangja shiogo. Pa party nungi anentsüogo.”
Tan hopta Rijiju-i Nagaland semdangtsü sentong lir aser iba mapang pai party candidate tem meiner oa nomination papers agütsütsü.