Naga, Ahom aser Karbi nunger IDWIP amungtsü : NPMHR

Dimapur, August 5 (TYO) : Alima den tsüngsü medema August 9, 2015 anepdang 11:00 ako nung Naga Peoples’ Movement for Human Rights (NPMHR)-i Yanpha yimtsüng nung International Day for the World’s Indigenous Peoples amungtsü.
Yanpha ya Assam den arrtsü anasa lir aser iba anogomung nung NPMHR-i Assam nungi Karbi aser Tai-Ahom nungertem den Rengma Naga, Assam, Naga Students’ Federation, Indigenous Women Forum of North East India, Lotha Hoho lennirtem aser Yanpha temeket aliba nübortem den külemi amungtsü.
Küm noklang aika Naga, Ahom aser Karbi nunger tsüngda yimtenren, loktilibaren aser rongsenren nung tesentaktep tajung yur liyonga arur aser kati ka arrtsü akhümtsübutepa arur. Ajisüaka, tanü-asüng ali tsütsü mangatettep adoka rarar aser ibaji Delhi sorkari aginüba ama lir, ta NPMHR-i sangdong ka nung metetdaktsü.
Ali atema mangatettep adokbaji Naga, Ahom aser Karbi lisopurtem tsüngda masü saka tangalen nungi arurtem den lir aser parnokji state sorkari pusema nungiter. Iba onük asoshi tatishitsü kaji, tawa Nagaland-Assam arrtsü anasa Wokha district kübok Ralan nung India kübok tanga state tem nungi arurtemi Naga nunger litsü atsünga agiba lir.
Tangalen nungi arua alirtemi lisopurtem akhümtsübutsüla aser asen li nung parnoki amalitepa alitsüla. Parnok aliba litsü nung aliba lisopurtem tsüngda mepetmesü madokdaktsütsüla. Asen litsü wazüka ayutsü atema asenok lisopurtemi parnok den tesentaktep ayutsü, ta NPMHR sangdong nungsa shia lir.
Küm noklang aika tesentaktep tajung aliba tali akangshitsü atema August 9 nü Yanpha yimtsüng nung International Day for the World’s Indigenous Peoples amungdang, sobaliba lemsatepba den olemtep alitsü.
Iba sentong nungsa state ana nungi lisopurtem tsüngda metsüjang aser süngdonglidongtem lemsateptsü aser olemtepba mapang lisopur teloktem tsüngda yimjung yanglutsü atema tebilemba benoka lemsateptsü, ta NPMHR-isa metetdaktsü.