Naga Archives and Research Center (NARC) lapokogo

Dimapur November 7 (TYO) : Honibarnü Dimapur kübok Toulazouma yimtsüng nung Naga Archives and Research Center (NARC) ta ser almanac-museum ka lapokogo.
Naga nunger taginüba atema raraba puti otsü mesüdaktsütsü nükjidong nung iba center ya tanü ang lapokaka, 2012 küm mezüng tenzüka liasü.
NARC ya Rev Dr VK Nuh-i apiteta lapokba lir aser iba nung Naga nunger nüjiso atema rara indang kulitem bendener.
Iba sentong nung Chief Minister TR Zeliang medentet saka pai PHED minister, Tokheho Yepthomi nem NARC nüngshilung lapoktsütsü atema mapa lemzüktsü.
“NARC ya Naga nunger lokti asoshi tenüng lapoktsür ka aser shisatsü angudak reju ka lir. Meimchirtemi taginüba metettsü atema iba ya tongtipang reju ka lir,” ta Yepthomi-i tanü o jembidang ashi.
“Asenok mekümdangra asen taginübatem ajanga teraksa jenti bener arutsür ta asenok Naga nungertemi asen dak atalokba nungi angatettsüla. Asenoki asen kidangertem den tesentaktep tajung ayutsüla, tebilemtsü khuret angatettsüla aser tangatetba shitak yur asen taginübatem tongtettsü merangtsüla,” ta paisa ayongzük.
Iba sentong nung Rev Yankey Patton-i NARC meshiteta sarasademtsü aser Konyak, Tangkhul aser Chakhesang kintemi sobaliba dak sendakba shilem balala agi.
NARC board of director Dr Visier Sanyu Meyasetsu-i ashiba agi, 1946 küm Naga National Council chaplain ama Rev Yankey Patton-i mezüngbuba Naga nunger wako atsüket.