Naga Army, NSCN/GPRN-i sepaitem amak

Dimapur, December 4 (TYO) : Indian Armed Force-i tawa Naga nunger lushi nung tashiyim mapa inyakba anema Naga Army, NSCN/GPRN-i December 3 nü Myanmar-Arunachal arrtsülen Assam Rifles indang gari ana amak, ta MIP, NSCN/GPRN sangdong ka nung metetdaktsü.
Iba mapang gari ka mitsü küma rongdoktsü aser idakji mena aliba sepaitem ka dang mekümzüki tepset. Iba tatalokba nung ketdangser ka dena India sepai 9 den teimba tepset aser aika kanga mejungi yirutsü, ta sangdong nung shia lir.
Iba tatalokba nung Naga Army nungi tasüba mesüra yiruba maliasü aser India sepaitemi ozü lushi nung tashiyim agi ketdangsüba anema Naga Army-i maneni raratsü, ta MIP, NSCN/GPRN sangdong nungsa shisem.