Naga arogo otsü kimong tejangja nüngdaker

– Sünep Tzüdir.

Naga limai Christian yimsü arur küm 150 (Sesquicentennial) ajungtsü küm 6 dang lir. Naga nunger ajaki Aorji Yimsü nung aser Education nung mezüng anguba kin ama aküm agüja arur. Saka yimsü tsütsülen reprang- dangra Aor jenjang kong lir. Tatishitsü agi, ainer kari Christian yimsüji kodang koba küm aru aser kong tenzük ta asüngdang nung kari langzütsü Molungkimong nung 1872 nung tenzük ta, karibo Molungyimsen nungang tenzük ta ashitsü akok, kechiba süra Molungkimong aser Molungyimsen Arogo anaprongla tenla kidang 1872 nung tenzükba Arogo ta zülua lir.
Küm aika mezüng lenir tzürabur tajungtem jenti iba ken o nung timtem jenti agia aruogo, kechiaser parnok mapang Written Documents peria menguteti liasü, saka tanü tendakbo lenirtem aser tashi temetetertemibo tarutsü lanur makmakshimak mesüdaktsütsüla. Naga nunger rongnung otsü bushir kari yamai shia liasü, “tang Aori yimsü aruba kimong tejangja mesayutetter. Kechiyong kodang onok Dr.Clark aruba yim semdangtsü tejangraba tulu nung temoatsü aginüa Ao limai aru, onoki yim ana nung kasasa 1872 nung Dr.Clarki tenzüktsüba Arogo ta Tenla Kidang zülua angu, ibaya ngua onok kanga mangmanga rataa liasü. Atangji, item ya tashi nungbo ABAM ajanga benteter alitsü tim sürnung, kechiaser iba ya agi tarutsü nunga lanurtem research asoshi tetsükdaktsü tulu adokdaktsütsü. Ashiko ainer karibo yim ana rongnungji ka dang semdangtettsü akok aser parnoki semdangba yim/Arogoji shidakba 1872 nung yangerba Arogo masü sür nung taiji amshia kaket aser media balala nung document küma amshira itemji tarutsü putu atema miim ama asütsü” ta parnoki ashidang kang akseta bilem.
Anungji bendangeri asenok maksüja temai madoktsüdang Aoer tashitemeteter aser Arogo lenirtemi anir item olungtem ya khen süoki yia bilemdangtsü mapang tongja tongogo ta ayongzüker.
1. Asen limai Dr.Clark ya 1872 nung asü, 1876 nung mezüng atu aser Molungkimong asü Molungyimsen-i atu ?
2. Molungkimong nungeri 1872-1876 tashi atalokbaji Molungkimong yimdak atalokba otsü aser shingaia amshitsü makok ta asüba ya shitak asü masü ?
3. Molungyimsen nungeri yim tasen akümdang tamanger ajak yim taseni ayi ta ashir aser Molungkimong nungeri tamanger ajak mai ta ashir, ya koba shidak ?
4. Molungyimsen yim 1876 nung aküm saka Tenla Kidangbo par Arogo tenzükba 1872 zülur maloka aliba ya tim asü masü ?
5. Molungkimong nung reshikangshi aliba agi yim tasen aküm ta shia lir, komala reshikangshisa liasü ?
6. Yim anaprongla nung 1872 zülur maloka alibaya ABAMi melar amshidaktsür asü, pei pei molung agi dang amshiteper ?
Item dak tali aika alitsü akok saka tongtibang ishikaya tama benteta ayutsü kanga nüngdak ta angatetba agi iba Olemsabang ajanga asen nüburtem dang tebilemba lemsateptsü ayongzüker.