Naga artist tem atema TaFMA-i GoCA lapoktsü

Kohima, September 24 (TYO): Task Force for Music & Arts (TaFMA)-i tanü Naga nunger artist tem asoshi Gallery of Contemporary Art (GoCA) sayatsüogo.
Iba gallery ya Regional Centre of Excellence for Music and Performing Arts (RCEMPA), Jotsoma nung lapoktsü.
Tanü Arts & Culture and Tourism Advisor H. Khehovi Yepthomi-i gallery lapoktsü.
Tanü Yepthomi-i o jembidang TaFMA advisor Theja Meru-i gallery lapoktsüsa mapa inyakba atema tenüngsang agütsü.
TaFMA tenteter anogo 100 ajungba anogo nung Gallery of Contemporary Art (GoCA) ya lapoker asütsü.
“Iba ya mapa tulu lir aser ajaki tenüngsang agütsütsüla. Naga nungertemi teti mapa manguba aser tanga khurettem indang jembir, saka Tsüngremi asenok nem moatsüba sempettem indangbo mejembir” ta Yepthomi-isa ashi.
“Asenoki sorkar mapa nung ang temulung agütsür. Tsüngremi Naga nunger nem sempet balala moatsüba indangbo nisung ishika agi dangi angateta lir. Tsüngremi asenok nem sempet aika moaja lir aser wadang balala nung asenoki mapa inyaktsü lenmangtem sadema lapoka lir. Asenoki tamakok angutsü ta tsübua bilemba agi tetsüng majemoker” ta paisa shisem.
Naga nunger artist temi pei tajungtiba agüja merangtsü aser iba Gallery ajanga tajangzük jenti angutsü imlar, ta Yepthomi-isa metetdaktsü.
Sentong nung TaFMA advisor Theja Meru-i o jembidang Chief Minister Neiphiu Rio-i teti yaria aruba atema pelaba metetdaktsü.
“Rio-i arts nungiter aser artist atema bilemtsür,” ta Meru-i ashi.
Nagaland nung artist temi mapang talangka art gallery ka aginüa aru. GoCA ya artist indang talidak ka lir aser iba art gallery küm piyong lapoktsü, ta paisa shisem.
GoCA ya Hombar nungi Hokolbar tashi anepdang 11:00 ako nungi nikongtsütsü 3:00 ako tashi lapoktsü. TaFMA-i NGO tem den yaritepa sentong balala ayonga agitsü, ta Meru-isa metetdaktsü.
TaFMA-i October 7 nungi 10, 2019 tashi mezüngbuba art camp ayongzüktsü aser mapang Nagaland indang noksatem yanglutsü.
TaFMA-isa Eastern Art Council (EAC) den yaritepa mezüngbuba Dimapur Art Festival ayonga agitsü. Iba sentongji October 15 nungi 19, 2019 tashi agitsü.
Iba sentong nung TaFMA project director Dr. Hovithal Sothu-i GoCA takok ngudaktsüba asoshi teyariteper ajak dang pelaba metetdaktsü.
GoCA gallery nung Akup Bhuchem, Among Venuh, Arenla Nungshi, Chuten Jamir, Cynthia Kolakhe, Lipokmanen, Mhasiselhu Viyie, Mhayani Kikon aser Tia Aier nungertem indang art balala yua lir.