Naga-Assam Dialogue Forum tentettsü

Kohima, May 14 (TYO): Nagaland aser Assam naprongla nungi lokti tentettemi “Naga-Assam Dialogue Forum” ka tentettsü lemtetogo.
Tanü Naga Hoho Tir, P. Chuba Ozukum-i, mapang talangka nungi NE tesem nung aianu state ana tsüngda arok sabang ka aginüa liasü, aser yashi Kohima nung Asom Sahitya Sabha (ASS) aser Naga Hoho (NH) külem senden tanabuba technical session amendang iba atemaji mulungtepa bangjemogo, ta metetdaktsü.
Senden nung, ASS aser NH na leniba nung iba forum nung state ana shia nungi tajemba agi züngsem ter pongungu asütsü ta lemtet. Naga-Assam Dialogue Forum nung züngsemtem tenüng benoktsü atema state nung tongti tentet ana nem nungloktsü, ta Chuba Ozukum-isa ashi.
Iba Forum-i Naga nunger aser Assam nunger, talisa arrtsülen alirtem tsüngda kiyonger ama tangatettep nung tesentaktep asentenshitsü atema inyaktsü.
Ajisüaka iba forum tentetba sülen ang inyakyimtemji tejangja jangjatsü.
Guwahati nung Nanda Talukdar Foundation-i ayonga yaküm October 9 nü Guwahati nung mezüngbuba round table  senden mena liasü, aser iba mapang nung kidanger state ana tsüngda tesentaktep tajungba küma arts, shisaliok, sobaliba aser shishilembaba nung amalitepa inyaktsü, iba den külemi alima wazüka ayutsü aser ajak dang tongtibangsüa arrtsü mangatettep bentettsü atema jembia liasü.