Naga Brothers-i 1 buba Invitational Badminton asayamong ayonga agiogo

Miss World Beauty India 2015, Imlibenla Wati (Achijilen nungi 3 buba); NB Tir, Sentimeren Pongen aser tayonger luden nung züngsemtem indang arok noksa ka yangi angur. (Dimapur, November 12)

Dimapur, November 12 (TYO): Naga Brothers (NB) teloki ‘Unity’ omen nung ajemdaker tan Bodbar nü nungi tenzüka Dimapur kübok Multipurpose Indoor Stadium nung ayonga asayaba 1 buba Invitational Badminton Tournament tanü Brehostibar nü tembangogo.
Asayamong tenzükba sentong nung tepela tejaoker ka ama Miss World Beauty India 2015, Imlibenla Wati-i shilem agia liasü.
“Srikanth Kidambi aser Sania Nehwal amala India’er badminton asayartem nungtugu International asayartem lir,” ta shia, Naga nungertemia international sabang nung shilem agitsü alizüng ayutsü tajungshiba olen ka tetushi tejaoker, Tali Akang-ia metetdaktsü.
“Naga nunger badminton asayartem nem saisapongtsü sabang lapoktsütsü aser badminton asayaba ajanga lokti nung telungjem lidaktsütsü nükjidong nung iba asayamong ya ayongzük,” ta NB nung Tir, Sentimeren Pongen-i osang jangjashitsü.
Tan asayamong takok ngua agitsüsa par telok yariba atema Lt Col I. Chubasashi Jamir aser kibong; Lanu Aier; Maple Tree School kibur, Sanen Imchen aser Limawati Aier nunger dang pelaba olen ka pai metetdaktsü.
Tanü asayamong tembangba sentong nung Dimapur Naga Students’ Union (DNSU) Tir, Sakulemba Jamir-i tajungshi o jembi aser Naga Orpheus Hunt 2014 nung finalist, Alemtemshi Imchen-i ken ka tena shilem agia liasü.
Phek, Peren, Kohima, Mokokchung, Ghaspani, Chumukedima aser Dimapur nungi telok 32 tashi tan asayamong nung shilem agiba osang jangjaogo.
Tan asayamong nung Shuttlers United telok asayar, Moanungsang aser M. Fujung Ao nati mezüngbuba aser kasa telok nungisa, Tongpangmeren Imsong aser Limatemsu Jamir nati tanabuba jenjang angu.