Naga Chef Season-6 round 4buba atema tetokteper 6 shimogo

Dimapur, Yimpoksüi/November 21 (TYO): Naga Chef Season-6 round tasembuba tembangba sülen tetokteper parnok trok Round-4buba “My Naga Thali” tongogo, koba Yimpoksüi/November 22 nü Macha Ki, Kohima nung akatsü.
Rasemnü tetokteper parnok tenet, Mystery Basket round nung chiyongtsü tapu balala agüja toktepa liasü, kong parnok sorchiokba tendangogo aser parnok rongnungi ka tsükdaktsüogo.
Luchii/Dec 1 nungi 9 tashi Hornbill Festival mapang business round nung shilem agitsü asoshi rangloker sorchiokba dang masü saka tang chef tem parnok indang sempet, innovation, presentation nung ajemdaker tendangba den Chef Joel Basumatry, Chef Alemjungla Jamir aser Chef Rovi Chase nungeri master class agütsüdar.
Yangtepnü Kohima Exotic School of Cooking-i achaayanga parnok nem master class agütsütsü renema lir.
Tetokteper parnok trok indang profile yamai alitsü:
1. DENNIS SUOHU:
Dennis ya Kohima nungi lir aser pai Naga Chef tetoktepba indang Social Media ajanga angazüka liasü aser pa iba tetoktepba trokbuba nung knga jangratema shilem agidar. Sorchioktsüba ya Dennis tejangraba ka lir aser Naga Chef nung toktepba ya pa indang sempet sayutsüba dang masü saka iba wadang nung nokdaka aliba nüburtem nungi angazüktsü asoshi sabang tajung ka lir. Pai iba maongka asoshi Synergy Group Enterprise and Tourism Department (GON) dang pelaba lemsatep.
2. TOKALI JAKHALU:
Sorchioktsü aser ken atentsü ya la tejangraba lir aser kibong nung tanabula asünung lai teti sorchiokba nung tetsü yaria liasü aser iba ajanga la tali tejangraba kümdaktsü. Naga Chef Season 6 nung shilem agiba ya la asoshi tajangshiba tajung ka lir aser iba den külemi culinary experts tem atema sorchioktsüba ya la asoshi tetushi ulura. Lai iba tetoktepba nung maneni shilem agitsü asoshi yongyaa atar aser Cafe mesera restaurant ka lapoktsü tejangraba lir. Lai ashiba agi, “nai kwiben sorchioker paibenji angazüker aser tajungba akümer. Iba ya taküm tepiyonga inyaka aotsüba maparen ka lir aser kodanga manentsü.”
3. LIPOK LONGKUMER (LONGKUMER A LI)
Sorchioktsüba ya tanur asüdang nungi Lipokba taküm nung shilem ka liasü aser pai indigenous recipes tasen amshia sorchioktsü jangrar. Pa Naga Idol Season 2 nunga shilem agiogo aser pa temaba jenjang 6buba tashi tongteta toktepogo. Pai kaket azüngtsü jangrar aser pa professional country singer ka lir.
4. DISUANG SAGO ZELIANG
Sago Disuang ya tang Hotel Grand Tizu nung Executive Chef lir. Pai tanur asüdang nungi sorchioktsü jangrar aser Animal King Hotel, Chennai nung Assistant Chef ama inyakogo aser Italian Restaurant, Belle Ciao nunga inyakogo. Pa China nunger chiyongtsü sorchiokba nung mongin lir saka Naga nunger chiyongtsü sorchioktsü kanga jangrar.
5. MHOMO NGULLIE
Mhomo ya tesem balala semdanga chiyongtsü tasen chidanga sobaliba tasen angazüktsü jangraba nisung ka lir. Pai chiyongtsü ajanga nisung sendaktepdaktsütettsü ta amanger. Pai ingredients tasen amshia sorchiokba yimya tasen tendangtsü jangrar. Naga Chef nung shilem agitsüba ya pa tejangraba ka liasü aser taküm iba tetoktepba nung shilem agitetba atema kanga pelar. Pa indang tejangraba tanga kaji chiyongtsü chitepba tetoktepba nung shilem agitsübaji lir.
6. VIKHULI ACHUMI
Vikhuli ya tanur asem tetsü lir, lai lar kibong aser ainertem atema sorchioktsü jangrar. Parnoki la sorchiokba chinüa tenüng asangba ajanga sorchioktsü tali jangradaktsü, saka sorchiokba tetoktepba ka nung shilem agitsü lai imlaa maliasü. La den külem tetokteper aser tetendangertem nungi aon tasen asotsü angazüktsü asoshi kanga jangraa shilem agidar.